Општина Аеродром ќе поставува видеонадзор на детските и спортските игралишта

Општина Аеродром започнува постапка за воспоставување систем за видеонадзор на детските и спортските игралишта, како и во парковите, со цел да се зголеми безбедноста и да се спречи вандализмот. Одлуката беше донесена на последната седница на Советот на Општината.

— реклама —

Од Општина Аеродром информираат дека проектот добил поддршка од советниците, на кои им изразија благодарност за препознавањето на важноста на оваа мерка.

— реклама —

Според општината, поставувањето видеонадзор е дел од пошироките активности за заштита на јавната инфраструктура, покрај реконструкцијата и обновата на детските и спортските игралишта.

Новиот систем треба да придонесе за спречување на вандализмот, заштита на општинскиот имот и урбаната опрема, зачувување на парковите и игралиштата, како и да им помогне на надлежните институции во откривањето на сторителите на казниви дела. Воедно, се очекува да овозможи поголем јавен ред и повисоко ниво на безбедност.

— реклама —

Од Општината посочуваат дека реализацијата на проектот ќе се одвива согласно законските процедури и со целосно почитување на прописите за заштита на личните податоци.

„Безбедноста е инвестиција во иднината. Со оваа мерка продолжуваме да создаваме побезбедни, поуредени и подобро зачувани јавни простори во интерес на сите граѓани“, наведуваат од Општина Аеродром.