Општина Илинден потпиша договор за реконструкција на регионалниот пат Илинден – Јурумлери, во соработка со Центарот за развој на Скопскиот плански регион.
Договорот го потпишал градоначалникот Александар Георгиевски, а со проектот е предвидена реконструкција на најоштетениот дел од патот, од улицата „19“ во населбата Илинден кон населеното место Јурумлери.
Според најавите, ќе се реконструира делница во должина од околу половина километар, со широчина на коловозот од 4,5 метри.
Од Општината посочуваат дека со зафатот ќе се овозможи побезбедно и поквалитетно сообраќајно поврзување, како и подобрување на инфраструктурните услови во овој дел од општината.
Георгиевски истакнал дека станува збор за значаен патен правец кој поврзува повеќе населени места од соседните општини и дека реконструкцијата ќе придонесе за подобро и побезбедно движење на сите учесници во сообраќајот.
Од Општина Илинден велат дека проектот е дел од заложбите за унапредување на патната инфраструктура и подобрување на условите за живот на граѓаните.
