Општина Илинден започна со реализација на нов инфраструктурен проект – изградба на канализациона линија на улицата „8“ во населбата Илинден, со цел подобрување на комуналната инфраструктура и условите за живот на жителите.
Новата канализациона мрежа ќе биде во должина од 130 метри и ќе се поврзе со постојниот фекален систем, односно со колекторот Илинден–Марино. Со нејзиното ставање во функција ќе се овозможи приклучување на околу 10 домаќинства, соопштија од општина Илинден.
Градоначалникот Александар Георгиевски изврши увид во почетокот на градежните активности, при што истакна дека проектот е значаен за решавање на долгогодишен проблем со одведување на отпадните води во овој дел од населбата, стои во соопштението.
„Со изградбата на оваа канализациона линија директно придонесуваме за подобрување на животната средина и создавање поквалитетни услови за живот на граѓаните“, изјави Георгиевски.
Од општината најавуваат дека и во наредниот период ќе продолжат со инвестиции во комуналната инфраструктура, со посебен акцент на проширување и модернизација на фекалната канализациона мрежа во повеќе населени места.
