Општина Кратово соопшти дека со години е спречена да управува со локалитетот Куклица, кој е прогласен за споменик на природата, обвинувајќи дека просторот е бесправно узурпиран и незаконски се наплаќа влез од посетителите.
Реакцијата доаѓа откако во јавноста се појавија сведоштва од граѓани и посетители дека им биле барани пари за влез на локалитетот, како и обвинувања за закани и недозволување пристап до природниот локалитет.
Од Општина Кратово наведуваат дека подолг временски период локалитетот е „бесправно и неосновано узурпиран и држен во владение“ од Здружението „Извор“ од Кратово, неговиот претседател Милош Димитровски и Стојна Димитровска Боотх.
Според општината, овие лица вршеле неовластено управување со просторот, присвојувале права што не им припаѓаат и остварувале противправна имотна корист преку наплата на влезници од туристи и посетители.
„Дополнително, истите лица вршат сериозно загрозување на сигурноста и безбедноста на посетителите преку заплашување, лажно претставување, насилничко однесување и заплашување со кучиња“, наведуваат од Општината.
Во соопштението се посочува дека Општина Кратово веќе обезбедила првостепена судска пресуда од 12 март 2026 година, со која Стојна Димитровска Боотх, Милош Димитровски и Здружението „Извор“ се задолжуваат да ги предадат во владение на Општинската установа „Музеј на град Кратово“ објектите и просторот кај локалитетот Куклица.
Пресудата, како што информираат, е обжалена и моментално се наоѓа пред второстепен суд.
Од Општината додаваат дека покрај граѓанската постапка поднесени се и повеќе кривични пријави за узурпација на недвижности, кои сè уште се во работа пред надлежното обвинителство.
„Општина Кратово останува посветена на заштита на јавниот интерес, законитото управување со природното наследство и безбедноста на граѓаните и посетителите, но очекува поголема вклученост и ажурност и од другите надлежни институции“, се наведува во соопштението.
Претходно, граѓани објавија сведоштва дека при обид да го посетат локалитетот им биле барани пари за влез, без издавање фискални сметки, а дел од нив тврдат дека биле спречувани да влезат или биле изложени на закани.
