Министерството за внатрешни работи потврди дека за случувањата поврзани со локалитетот „Камени Кукли“ во селото Куклица, кратовско, веќе се водат судски и обвинителски постапки, а по најновите пријави од 7 јуни годинава повторно се известени надлежните институции.
Од МВР информираат дека уште во 2024 година случајот бил пријавен во Одделението за внатрешни работи Кратово, по што до Основното јавно обвинителство Куманово било доставено известување за преземените мерки и активности.
„Од ОЈО Куманово е покренат обвинителен акт против лицата С.Д. и М.Д., како и против здружението ‘Извор’, за кривично дело ‘узурпација на недвижности’ по член 225 став 1 од Кривичниот законик“, велат од МВР.
Дополнително, против лицето С.Д. бил изречен казнен налог поради закани кон туристи со пуштање куче за време на нивна посета на локалитетот.
Според полицијата, во текот на 2026 година против С.Д. и нејзиниот сопруг Е.М.Б. е поднесена и кривична пријава за кривично дело „спречување службено лице во вршење службено дејствие“ по член 382 став 3 од Кривичниот законик.
Во врска со најновите настани што биле пријавени на 7 јуни на локалитетот „Камени Кукли“, известен е јавен обвинител од Основното јавно обвинителство Куманово.
Од ОВР Кратово најавуваат дека дополнително ќе бидат известени и Државниот пазарен инспекторат, Управата за јавни приходи, Трудовиот инспекторат, надлежен инспектор при Министерството за култура и Општина Кратово, со цел преземање мерки од нивна надлежност.
Случајот повторно го отвори прашањето за управувањето со еден од најпознатите природни локалитети во Македонија, откако во изминатите денови во јавноста се појавија сведоштва и реакции за наплата на влез, попречување на посетители и наводна узурпација на просторот.
(Видео) „Ми се закани дека ќе ми ја изгребе колата“ – сведоштва за инциденти кај локалитетот „Куклица“ во Кратово
Локалитетот „Куклица“ кај Кратово повторно е во центарот на вниманието откако граѓани објавија сведоштва за наводна незаконска наплата за влез и попречување на пристапот до природната знаменитост, која е прогласена за споменик на природата.Марио Станојковски објави дека бил спречен да влезе на локалитетот и тврди дека од посетителите се наплатувале пари без законска основа.„Куклите кај Кратово се природно богатство кое им припаѓа на сите нас. Јавен простор, создаден од природата, даден за сите. Денес повторно бев спречен да влезам. Стои на портата и со тело блокира пристап до јавен простор, без никакво законско право“, напиша Станојковски.Тој тврди дека разговарал со туристи од Косово кои му кажале дека платиле по 10 евра за влез, а при претходна посета и по 20 евра по лице.Дополнителни сведоштва споделија и други граѓани.Петар Слејановски наведува дека со семејството бил спречен да го посети локалитетот затоа што од нив била побарана наплата за влез.„Жената со нејзиното дрско однесување извади клучеви и ми се закани дека ќе ми ја изгребе колата и ќе ми ги дупне гумите ако продолжам, а не платам 240 денари за влез“, тврди Слејановски.Сара Драгевска, пак, наведува дека на пат кон локалитетот била запрена од полициски службеници кои им препорачале да се вратат.„Полицајците ни рекоа дека до тогаш се расправале со некој што наплаќал скап влез без да издава фискална сметка и дека најдобро е да се вратиме“, наведува таа.Во меѓувреме, на социјалните мрежи повторно се споделува објава на Општина Кратово од 24 јуни 2025 година, во која локалната самоуправа соопшти дека до Основното јавно обвинителство поднела кривична пријава поврзана со локалитетот „Куклица“.Во тогашното соопштение Општината тврдеше дека објектот и земјиштето на локалитетот се узурпирани од физички лица кои вршеле „неосновано и бесправно управување со просторот и користење на одредени права на стопанисување без основ и без согласност на ниту една надлежна институција“.Засега нема официјална реакција од лицата кои се споменуваат во обвинувањата, ниту од надлежните институции за најновите наводи на граѓаните.
Македонија | пред 1 ден
