Новo супервештачење ќе утврдува што се случувало во домот на Илијевска која ги усмрти сопругот и свекоротво

Основниот суд во Куманово одобри барање за дополнително супервештачење од Клиниката за психијатрија во случајот против Вангелица Илијевска – жената обвинета дека минатата година ги усмрти сопругот и свекорот во нивниот дом во Кратово.

— реклама —

Одлуката следува по иницијатива на обвинителството, кое смета дека новото стручно мислење треба да ги расчисти сите нејаснотии и разлики што произлегоа од претходните психијатриски вештачења изработени на барање и на обвинителството и на одбраната.

Обвинителот Газменд Мехмеди укажа дека досегашните експертизи содржат пропусти и неусогласени заклучоци, поради што е потребно ново, заокружено мислење за психичката состојба на обвинетата во моментот на делото.

— реклама —

Одбраната, преку адвокатот Кристијан Георгиевски, истакнува дека и двата досегашни извештаи посочуваат на исто – дека Илијевска живеела во долгогодишен семеен конфликт и чувство на загрозеност, што довело до афективна реакција и уверување дека се брани од опасност по живот.

— реклама —

Судијата оцени дека во деталите околу самото извршување на делото постојат противречности, па затоа е потребно дополнително супервештачење со цел да се избегнат различни правни толкувања и евентуални пропусти.

Обвинителството ја терети Илијевска за убиство по член 123 од Кривичниот законик, додека одбраната тврди дека таа дејствувала во нужна одбрана.

Следното рочиште ќе се одржи во февруари следната година.