СДСМ денеска преку соопштение упатија критики за изборот на унгарската компанија „Икарус“ на тендерот за набавка на електрични автобуси за јавниот превоз во Скопје, изнесувајќи тврдења за политичка поврзаност на компанијата со поранешниот унгарски премиер Виктор Орбан.
Од партијата тврдат дека автобусите што треба да бидат набавени се поскапи за околу 8.000 евра по возило во споредба со претходниот тендер и дека зад компанијата „Икарус“ стои бизнисменот Габор Селеш, за кого велат дека е долгогодишен поддржувач на Орбан и близок до партијата Фидес.
Во соопштението СДСМ наведува дека изборот на компанијата претставува, како што тврдат, продолжување на соработката меѓу кругови блиски до Орбан и актуелната власт во Македонија.
Партијата воедно го поврзува случајот со истрагите што, според нив, се водат во Унгарија за кредитот од една милијарда евра и за, како што наведуваат, зделките поврзани со Орбан, оценувајќи дека во Македонија истиот круг продолжува да добива државни тендери.
Од СДСМ изнесуваат и тврдења дека унгарската компанија „4iG“ била донесена во земјава како дел од поширока стратегија поврзана со телекомуникациите и медиумите, обвинувајќи дека политички поврзани компании добиваат значајни проекти.
За изнесените тврдења во соопштението не се приложени докази, а Владата и другите споменати страни засега не се произнесоа по овие обвинувања.
