СДСМ преку соопштение тврдат дека проектот за пречистителната станица за отпадни води во Скопје е започнат и финансиски обезбеден во време на нивното владеење, обвинувајќи дека актуелните градски власти неоправдано го претставуваат како свој успех.
Од партијата посочуваат дека постапката за реализација на проектот започнала во декември 2019 година, тендерот бил распишан во 2020 година, а финансирањето, вредно повеќе од 200 милиони евра преку Европската банка за обнова и развој (ЕБОР), Европската инвестициска банка (ЕИБ) и грант од Европската Унија, било обезбедено во периодот кога СДСМ била на власт. Договорот за изградба, велат, бил потпишан во април 2023 година.
Според СДСМ, по преземањето на Град Скопје, градоначалничката Данела Арсовска ја забавила реализацијата на проектот. Од партијата наведуваат дека бил разрешен директорот, иако, како што тврдат, европските партнери немале забелешки за постапката. Дополнително, обвинуваат дека со месеци бил одложуван изборот на фирмите за надзор и за изведба, иако процесот на бодување веќе бил завршен.
Од СДСМ додаваат дека имало доцнење и во исплатите кон изведувачите, а сега, кога проектот повторно се реализира, актуелните власти се обидуваат да го претстават како сопствено достигнување.
„Орце не може да го среди градскиот сообраќај, не може да го реши проблемот со ѓубрето во главниот град, а уште помалку еколошките проблеми. Орце не е способен ниту билборд да направи без грешка, а камоли да управува со инфраструктурен проект вреден над 200 милиони евра“, наведуваат од СДСМ.
Од партијата порачуваат дека пречистителната станица не е проект на актуелната власт, туку проект што, според нив, бил започнат, финансиски обезбеден и подготвен за реализација од страна на СДСМ, додека ВМРО-ДПМНЕ, како што тврдат, само го забавувала неговото спроведување.
