Оризот се откупува за 16 денари, производителите стравуваат за идната жетва

Ниската откупна цена на оризот ги загрижува производителите од Кочанско, кои велат дека со актуелните 16 денари за килограм едвај ги покриваат трошоците за производство.

— реклама —

На средба со оризопроизводителите во Горни Подлог, заменик-претседателката на СДСМ, Фани Каранфилова-Пановска, оцени дека состојбата во оризопроизводството е сериозна.

Каранфилова-Пановска посочи дека ниската откупна цена е еден од најголемите проблеми со кои годинава се соочуваат земјоделците. Таа потсети дека во 2021 година оризот се откупувал по 42 денари за килограм.

— реклама —

Производителите велат дека во исто време со падот на откупната цена растат и трошоците за производство. Како проблеми ги посочуваат повисоките цени на горивата, ѓубривата и механизацијата, како и неизвесноста околу сигурниот откуп.

— реклама —

Од СДСМ предлагаат државата да обезбеди дополнителна субвенција од 10 денари за секој произведен и откупен килограм ориз. Според партијата, предлог-законот веќе е доставен до Собранието.

Каранфилова-Пановска ги повика Владата и владејачкото мнозинство да го поддржат предлогот и преку ребалансот на буџетот да обезбедат средства за дополнителна поддршка на оризопроизводителите.

— реклама —

Земјоделците предупредуваат дека, доколку состојбата продолжи, следната година може да немаат доволно средства за повторно да ги засеат нивите, со што производството на ориз би било дополнително доведено во прашање.