Потпретседателот на ДУИ, Бујар Османи,преку соопштение реагираше на обвинувањата од коалицијата Влен, оценувајќи дека тие, според него, се обидуваат официјалните дипломатски средби да ги претстават како политички определби.
Во реакцијата, Османи наведува дека е несериозно средбите што ги остварува министер за надворешни работи да се толкуваат како политичка определба, додека, како што тврди, коалицирањето со партии кои ја негираат независноста на Косово, геноцидот во Сребреница и го релативизираат Охридскиот рамковен договор се претставува како нормална политичка практика.
Тој посочува дека, според логиката на Влен, би требало да бидат критикувани и светски лидери кои се среќаваат со претставници на држави со кои имаат несогласувања, нагласувајќи дека суштината на дипломатијата е токму водење дијалог со оние со кои постојат разлики.
Османи истакнува дека дипломатските средби се уставна и законска обврска на министерот за надворешни работи, додека коалицирањето претставува политички избор и, според него, овие две работи не треба да се поистоветуваат.
Во реакцијата се наведува и дека соопштението на кое се повикува Влен е официјално соопштение на Кабинетот на претседателот на Србија, кое, според Османи, ги одразува ставовите на српската страна, а не на Република Северна Македонија.
Османи додава дека и денес би се сретнал со секој свој странски соговорник, без разлика на политичките разлики, бидејќи тоа е обврска на шефот на дипломатијата. Сепак, нагласува дека никогаш не би избрал да коалицира со политички субјекти кои, според него, ја негираат независноста на Косово, го релативизираат геноцидот во Сребреница или ги поткопуваат правата на Албанците.
