Премиерот Христијан Мицкоски изјави дека Владата останува на проекциите за економски раст од над 3,5 проценти оваа година, посочувајќи дека резултатите од првиот квартал се охрабрувачки.
Одговарајќи на новинарско прашање за очекувањата во однос на движењето на економијата и бруто домашниот производ (БДП), Мицкоски истакна дека реалниот раст во првиот квартал изнесувал 3,1 процент, додека според сезонски усогласените вредности достигнал 3,3 проценти.
„Ние остануваме на оние проекции коишто ги имавме, дека ќе биде над 3,5%. Имајќи предвид дека во првиот квартал остваривме раст реален од 3,1%, а со усогласени вредности 3,3%, сезонски усогласени вредности 3,3%, што во однос на бруто домашниот производ претставува еден од најдобрите во Европа во овој момент“, изјави Мицкоски.
Тој додаде дека, и покрај критиките и обидите за, како што рече, извртување на фактите, економските показатели упатуваат на позитивни движења.
„Колку и да сакаат поединци да ја извртуваат вистината или сатирично да го пренесуваат сето тоа. Но за нив имам лоша вест – Македонија забрзува, Македонија победува и Македонија, како многу пати во историјата, ќе победи“, порача премиерот.
