Германскиот тенисер Александар Зверев предизвика бурни реакции по изјавата дека себеси се гледа во иста група играчи со Карлос Алкарас и Новак Ѓоковиќ.
По убедливиот пораз од Јаник Синер во финалето на Мадрид, Зверев изјави дека постои јасен јаз меѓу Синер и остатокот од турнирскиот караван, но дека веднаш зад него се наоѓаат тој, Алкарас и можеби Ѓоковиќ.
Таквиот став остро го критикуваше поранешната светска број еден во двојки, Рене Стабс.
„Како може да се става во иста категорија со Алкараз? Тоа е лудост. Карлос на 22 години има освоено сите Гренд слем турнири, а Зверев нема ниту еден“, изјави Стабс.
Таа додаде дека би имала многу поголема почит доколку германскиот тенисер признал дека мора дополнително да напредува за да им се приближи на Синер и Алкарас.
Стабс особено беше разочарана од неговиот настап во финалето против Синер.
„Изгледаше како разгалено дете. Целосно се распадна и му дозволи на мечот да му избега без речиси никаков отпор“, порача таа.
