Осуденичка преживеала егзекуција во САД, останала жива и по две дози смртоносна инјекција

Властите во американската сојузна држава Тенеси ги одложија сите планирани егзекуции откако не успеа да биде извршена смртната казна врз Криста Гејл Пајк, осудена за убиство извршено во 1995 година. По вбризгувањето на две дози пентобарбитал, 50-годишната Пајк останала жива.

Нејзините адвокати соопштија дека службениците ѝ вбризгале две дози од лекот, по што таа останала жива и се слушало како силно ’рчи. Пајк со амбулантно возило била пренесена во болница, а адвокатите рекоа дека сè уште немаат информации за нејзината здравствена состојба.

Гувернерот на Тенеси, Бил Ли, нареди „сеопфатна надворешна истрага за да се утврди што точно се случило“. Тој потврди и дека сите други егзекуции планирани за оваа година ќе бидат одложени.

— реклама —

„Извршувањето на законски изречена пресуда е една од најсериозните одговорности на државата, а жителите на Тенеси очекуваат тоа да биде направено на начин кој не само што е законски и во согласност со Уставот, туку и ефикасен“, изјави Ли.

Ова е вторпат годинава властите во Тенеси да не успеат да извршат егзекуција. Во мај беше откажана егзекуцијата на Тони Карутерс, осуден за киднапирање и убиство на три лица, откако службениците повеќе од еден час не успеале да му постават интравенска линија за внесување на пентобарбитал.

— реклама —

Според протоколот, доколку затвореникот не почине по првата доза, се аплицира втора. Правилникот, сепак, не предвидува што треба да се направи доколку осуденикот остане жив и по втората доза.

Од Затворската служба на Тенеси соопштија дека биле следени „сите чекори од законскиот, воспоставен протокол за егзекуции на државата, одобрен од канцеларијата на главниот обвинител“.

Адвокатите на Пајк поднесоа итни барања до неколку судови за егзекуцијата да биде запрена и поништена. Тие тврдат дека Пајк претрпела „непотребна агонија“ и дека било прекршено нејзиното уставно право да не биде подложена на суров и невообичаен третман.

— реклама —

Пајк беше осудена на смрт за убиство извршено кога имала 18 години и требаше да биде првата жена егзекутирана во Тенеси по повеќе од 200 години. Апелацискиот суд вчера ја запре егзекуцијата само еден час пред нејзиниот почеток, но неколку часа подоцна Врховниот суд на САД ја укина таа одлука.

Пајк и нејзиното момче беа прогласени за виновни за убиството на нивната 19-годишна соученичка Колин Слемер во Ноксвил во 1995 година. Слемер била прободена и претепана, а случајот тогаш привлече големо внимание поради пентаграмот издлабен на нејзиното тело и други околности кои предизвикале сомнежи за поврзаност со сатанистички култ.

Со приближувањето на датумот на егзекуцијата повторно се отворија дебатите во САД за смртната казна за млади престапници. Пајк не го негира извршувањето на убиството, но нејзините поддржувачи укажуваат дека при изрекувањето на казната требало да се земат предвид нејзината возраст, историјата на сериозно сексуално злоставување од најрана возраст и нејзиното ментално заболување.

Нејзиниот адвокат дополнително тврди дека смртната казна е невообичаена бидејќи казните на сите други затвореници во Тенеси кои имале 18 години во времето на извршувањето на делото веќе биле поништени.

Егзекуцијата на Пајк требаше да биде 30-та во САД годинава, откако во вторникот беше егзекутиран осуденик на смрт во Флорида.