Министерството за внатрешни работи во изминатото деноноќие евидентирало осум случаи на семејно насилство низ државата. Во пет случаи сторителите биле лишени од слобода, а со едно лице бил извршен службен разговор.
Во Кичево, полициски службеници ја привеле 40-годишната Ј.С., откако било пријавено дека во алкохолизирана состојба физички ја нападнала својата малолетна ќерка во семејниот дом.
Во Куманово е приведен 34-годишниот В.В., по пријава од неговата поранешна сопруга дека физички ја нападнал во неговиот дом.
Во Битола, полицијата го лишила од слобода 53-годишниот В.А., кој, според пријавата, со огнено оружје ѝ се заканувал на својата сопруга.
Во Прилеп, 50-годишна жена пријавила дека била физички нападната од својата стрина, а полицијата презема мерки за расчистување на случајот.
Во Росоман, 67-годишна жена пријавила дека нејзиниот сопруг, кој бил под дејство на алкохол, физички ја нападнал во семејниот дом.
Во Скопје, во полициската станица во Кисела Вода бил извршен службен разговор со 21-годишник, кој е осомничен дека физички ја нападнал својата поранешна партнерка, ѝ упатувал закани и го оштетил нејзиниот мобилен телефон.
На подрачјето на Чаир, полицијата го привела 38-годишниот Б.П., по пријава дека физички го нападнал својот 76-годишен очув.
Неколку часа подоцна, повторно во Чаир, бил лишен од слобода и 46-годишниот Б.М., осомничен дека со тврд предмет физички го нападнал својот малолетен син.
Од МВР информираат дека по целосното документирање на сите случаи ќе бидат поднесени соодветни поднесоци.
