Осумте случаи на западнонилска треска се видливиот врв на епидемиолошката „санта мраз“, под површината останува непознат број инфекции, вели Даниловски

Епидемиологот Драган Даниловски преку објава на социјалните мрежи посочува дека осумте досега регистрирани случаи на западнонилска треска во Македонија не ја прикажуваат вистинската епидемиолошка слика, бидејќи сите се однесуваат на тешката, невроинвазивна форма на болеста.

Според него, клучното прашање е колку вкупно лица биле заразени, а не само колку од нив завршиле во болница. Тој објаснува дека околу 80 проценти од заразените немаат никакви симптоми, кај околу 20 проценти се развива полесна форма на болеста, додека тешките невролошки компликации се јавуваат кај помалку од еден процент од инфицираните.

— реклама —

Даниловски нагласува дека токму овие потешки случаи најчесто се лабораториски потврдени и влегуваат во официјалната статистика, додека голем број асимптоматски и лесни инфекции остануваат нерегистрирани.

Тој предупредува дека без вакво објаснување може погрешно да се заклучи дека западнонилската треска кај сите заразени предизвикува тешка болест или дека вирусот станал поагресивен, што, како што истакнува, не е точно.

— реклама —

Како особено значајно го издвојува фактот што најголемиот дел од регистрираните случаи се автохтони, што укажува дека вирусот ова лето локално циркулира преку природниот циклус птици–комарци и дека населението е изложено на ризик.

— реклама —

Според Даниловски, во моментов најважни се засилен епидемиолошки и ентомолошки надзор, следење на активноста на вирусот, систематска контрола на комарците и лична заштита од нивни убоди.

Тој потенцира дека изолираните бројки сами по себе не даваат целосна слика, туку нивното вистинско значење се добива само кога ќе се анализираат во поширок епидемиолошки контекст.