Министерката за образование и наука Весна Јаневска порача дека училиштата ја започнуваат новата учебна година подготвени, со обезбедени учебници, подобрена инфраструктура, технички помагала и поевтин училишен прибор.
„Подготвени сме за учебната година, учебници има, инфраструктурата се подобрува, обезбедуваме технички помагала и сè што е потребно. Им посакувам на сите многу успех“, изјави Јаневска.
Таа им посака успешна учебна година на учениците и наставниците, со порака до децата вредно да учат, но и да создаваат нови пријателства.
Осврнувајќи се на привременото затворање на училишта, главно во руралните средини, поради малиот број ученици, Јаневска рече дека проблемот е директно поврзан со демографските движења.
„Ако продолжиме вака, ние постојано ќе затвораме училишта. Оттука, можеби порака до првачињата: освен да бараат да стекнат знаење, можеби треба да бараат да стекнат братче или сестриче за овие привремено затворени училишта во иднина повторно да ги отвориме. Населението да стане свесно колку човечкиот капитал е значаен, пред сè за нив самите и нивниот живот и, секако, за нивната држава – нивната татковина. Затоа што сите знаеме што значи да се живее во една прогресивна и доброразвиена земја“, рече Јаневска.
Во однос на намалувањето на бројот на првачиња за речиси 3.000 во споредба со минатата година, Јаневска оцени дека демографијата е сложен проблем за кој се потребни повеќе мерки.
Таа посочи дека Министерството вложува во инфраструктурата, технологијата, наставните програми, наставните помагала и редовното снабдување со учебници, со цел да се подобрат условите за учениците.
„Сè што правиме е со цел животот на децата во Македонија да биде попријатен. А кога на децата им е убаво, верувам дека и родителите ќе имаат поголема причина да останат тука и да се охрабрат да имаат повеќе деца“, порача Јаневска.
