Студентите, кои со месеци ги предводат антивладините протести во Србија, со иронија му одговорија на претседателот Александар Вучиќ, откако тој потенцијалните кандидати на нивната изборна листа ги нарече „паразити на државните јасли“.
„Но, претседателе… не сте на листата“, „Проекцијата е чудо“ и „Некој ве излажал. Не сте на листата“ се дел од пораките што студентите ги објавија на социјалните мрежи и ги упатија преку медиумите.
Протестите во Србија започнаа по трагедијата при уривањето на натстрешницата на железничката станица во Нови Сад, кога загинаа 16 лица. Студентите ја обвинуваат власта за несреќата и бараат борба против корупцијата, независни институции, демократизација на општеството и распишување предвремени парламентарни избори.
Во меѓувреме, провладините медиуми во Србија објавија наводен список на личности кои би можеле да бидат кандидати на студентското движење. Реагирајќи на тие информации, Вучиќ изјави дека станува збор за луѓе кои, според него, не се компетентни да ја водат државата, додавајќи дека повеќето работат во државни институции или на универзитетите и примаат плата од државниот буџет. Тој ги нарече „интересна група“ и „чопор без идеја“.
Студентите, пак, нагласуваат дека нивната изборна листа сè уште не е објавена и дека информациите што ги пласираат провладините медиуми се шпекулации.
„Кога ќе одлучиме да ја објавиме официјалната листа, тогаш ќе може да ја коментира. Веруваме дека изјавата на Вучиќ за наводните кандидати произлегува од неговото лично искуство. Тој најдобро знае како е да се биде паразит на државните јасли“, изјави студент од Белградскиот универзитет за порталот „Нова С“.
Според списокот што го објави „Информер“, меѓу потенцијалните кандидати се ректорот на Белградскиот универзитет Владан Ѓокиќ, поранешните спортисти Немања Видиќ и Дејан Бодирога, поранешната обвинителка Јасмина Пауновиќ, лекари, универзитетски професори и други јавни личности.
Студентите порачаа дека единствената официјална изборна листа ќе биде објавена откако ќе бидат распишани изборите.
