Министерството за внатрешни работи објави јавен повик за прием на 200 редовни ученици во Средното полициско училиште „7-ми Мај“, кое функционира во рамки на Полициската академија.
Право на пријавување имаат ученици кои ја завршиле втората година од средното образование, се државјани на Македонија, немаат наполнето 18 години на денот на објавувањето на повикот, активно го користат македонскиот јазик и се здравствено и психофизички способни.
Покрај општите услови, кандидатите треба да имаат најмалку добар општ успех во прва и втора година средно образование, да немаат изречени педагошки мерки, да ги поминат проверките на моторичките способности, да положат општообразовен тест и успешно да поминат интервју.
Пријавувањето се врши во рок од 15 дена од објавувањето на јавниот повик, во определените сектори за внатрешни работи и полициски станици низ државата.
Селекцијата ќе се спроведува во три фази – проверка на физичката подготвеност, писмен тест со 40 прашања и интервју. По завршувањето на постапката ќе биде изготвена конечна ранг-листа на примени ученици.
За запишаните ученици, МВР ќе обезбеди сместување во ученичкиот дом во рамки на Полициската академија, исхрана и работна облека.
По успешно завршување на четиригодишното образование и положување на завршниот испит, Министерството за внатрешни работи ќе заснова работен однос со дипломираните ученици на работното место полицаец, без распишување јавен оглас, согласно законските прописи.
