На планината Каблар свечено беше отворен првиот стаклен видиковец во Србија, кој се очекува да стане една од најпосетуваните туристички атракции во земјата.
До новиот видиковец од Белград се стигнува за околу еден час и дваесет минути, а цената на билетот изнесува 500 динари.
На отворањето присуствуваше и српскиот претседател Александар Вучиќ, кој истакна дека станува збор за значаен туристички и развоен проект.
„Ова е првиот стаклен видиковец во Србија и верувам дека е меѓу најатрактивните во Европа. Инвестиравме во патишта, паркинзи, Природонаучниот музеј, амфитеатарот и овој видиковец. Уверен сум дека инвестицијата брзо ќе се исплати и ќе придонесе за развојот на туризмот и локалната економија“, изјави Вучиќ.
Тој додаде дека државата вложила повеќе од 1,2 милијарди динари во реализацијата на проектот, без да се пресметаат трошоците за изградба на пристапните патишта.
Вучиќ оцени дека новата атракција ќе привлече голем број посетители од Белград, Нови Сад и од другите делови на Србија, кои ќе придонесат за развојот на локалниот туризам и угостителството.
Според најавите, стаклениот видиковец треба да стане нов симбол на Каблар и да донесе дополнителен економски поттик за регионот преку зголемен број домашни и странски туристи.
