Западнонилската треска е вирусна инфекција што се пренесува на луѓето преку убод од заразен комарец, кој претходно се инфицирал хранејќи се со крв од заразена птица. Вирусот не се пренесува директно од човек на човек преку допир, бакнеж или нега на заразено лице.
Поголемиот дел од заразените немаат никакви симптоми или имаат лесни тегоби, како покачена телесна температура, главоболка, болки во мускулите, осип или зголемени лимфни јазли. Кај помал број лица, особено кај оние постари од 50 години, западнонилската треска може да предизвика сериозни компликации, како енцефалитис или менингитис, а во ретки случаи и трајни оштетувања на нервниот систем.
Вирусот на западнонилската треска најчесто го пренесуваат обичниот и тигрестиот комарец. Иако не постојат докази дека вирусот директно се пренесува од птици на луѓе, се препорачува угинатите птици да не се допираат со голи раце.
Специфична терапија за западнонилската треска не постои. Кај потешките случаи се применува болничко лекување и симптоматска терапија.
Лекарите советуваат веднаш да се побара медицинска помош доколку по убод од комарец се појават висока температура, силна главоболка, вкочанет врат, мускулна слабост, збунетост или чувствителност на светлина.
За намалување на ризикот од инфекција се препорачува:
користење средства против комарци;
носење облека со долги ракави и ногавици, особено од самрак до зори;
поставување мрежи на прозорците;
отстранување на застоена вода околу домовите, каде што комарците ги положуваат своите јајца.
Иако ризикот од заразување по убод од комарец е мал, експертите предупредуваат дека постарите лица и хронично болните треба да бидат особено внимателни и доследно да ги применуваат мерките за заштита.
