Премиерот Христијан Мицкоски на денешната седница за пратенички прашања во Собранието ги отфрли критиките на лидерот на СДСМ, Венко Филипче, поврзани со јавниот долг, оценувајќи дека актуелната Влада постигнала подобри економски резултати со значително помало задолжување.
Според Мицкоски, споредбата меѓу економските показатели од периодот на владеење на СДСМ и сегашната Влада покажува дека за трипати помало задолжување и во трипати пократок временски период, е остварен повисок раст на номиналниот бруто-домашен производ.
„Кога веќе зборувате за јавниот долг, потребно е да се погледне и што се случувало со номиналниот БДП. Во периодот од 2018 до 2023 година јавниот долг се зголемил од 4,78 на 8,47 милијарди евра, односно за 3,69 милијарди евра. Во изминатите две години, според вашите пресметки, долгот е зголемен за околу 1,38 милијарди евра, што е речиси трипати помалку“, рече Мицкоски.
Премиерот, повикувајќи се на податоци од Меѓународниот монетарен фонд, истакна дека за време на владеењето на СДСМ номиналниот БДП пораснал за 4,52 милијарди долари, додека во периодот на актуелната Влада, според неговите тврдења, е зголемен за 4,66 милијарди долари.
„Тоа значи дека оваа Влада за две години успеала да го зголеми номиналниот БДП за 140 милиони долари повеќе отколку што беше направено во претходните шест години, и тоа со значително помало задолжување“, нагласи Мицкоски.
Тој оцени дека економските резултати на актуелната Влада покажуваат поефикасно управување со јавните финансии и посочи дека за трипати пократок период е остварен раст на економијата со трипати помало зголемување на јавниот долг.
