Несаканите дејства можат да предизвикаат сериозни здравствени компликации, предупредуваат лекарите.
Според експертите, алкохолот влијае врз начинот на кој организмот ги апсорбира и разградува лековите, а ризикот зависи од видот на терапијата, возраста, здравствената состојба и количината на испиен алкохол.
Особено се препорачува да не се комбинира алкохол со:
лекови против болка, како парацетамол, ибупрофен и аспирин, бидејќи може да го зголеми ризикот од оштетување на црниот дроб и крвавење во дигестивниот систем;
антидепресиви, кај кои алкохолот може да ја намали ефикасноста на терапијата и да предизвика поспаност, вртоглавица и нарушена координација;
одредени антибиотици, особено метронидазол, кој во комбинација со алкохол може да предизвика мачнина, повраќање, главоболка, црвенило на лицето и забрзана работа на срцето;
антипсихотици, бидејќи комбинацијата може да доведе до силна поспаност, пад на крвниот притисок, проблеми со дишењето и други сериозни компликации;
лекови за смирување и таблети за спиење, особено бензодиазепини, кај кои постои ризик од опасно забавено дишење, нарушена координација и губење на свеста;
лекови за дијабетес, затоа што алкохолот може опасно да го намали нивото на шеќер во крвта;
лекови за разредување на крвта, како варфарин, при што се зголемува ризикот од крвавење или создавање тромбови.
Лекарите нагласуваат дека дури и мала количина алкохол може да биде ризична во комбинација со одредени терапии. Затоа, пред консумирање алкохол, се препорачува консултација со лекар или фармацевт.
Доколку по комбинирање на алкохол и лекови се појават силна поспаност, отежнато дишење, силна вртоглавица, болки во стомакот, губење на свеста или други сериозни симптоми, потребно е веднаш да се побара медицинска помош.
