АВМУ

АВМУ со вонреден надзор констатира уредничка одговорност за емитуваната песна за “Голема Албанија“

Агенцијата за аудио и аудиовизуелни медиумски услуги спроведе вонреден програмски надзор врз Вториот телевизиски канал на Јавниот радиодифузен сервис врз музичката програма „Фестивал на детска песна – Билбилите на Кораб“ емитувана на 28 март 2026 година.„Извештајот од надзорот е објавен на веб страницата на Агенцијата на следниов линк. Констатациите од надзорот се дека со изведбата на песната „Албански територии (Trojet Shqiptare)“ се поттикнува и шири нетрпеливост врз основа на национална и етничка припадност преку иредентистички симболи и експлицитни политички пораки за промовирање на моноетнички, иредентистички „аманет“ за обединување на територии. Девојчето кое ја пееше песната „Албански територии (Trojet Shqiptare)“, беше облечено во маица на која на предната страна беше прикажана јасна илустрација на картата на т.н. „Голема Албанија“ која вклучува територии на Албанија, Црна Гора, Северна Македонија, Србија, Косово и Грција, на која е претставена територија на која живеат или живееле етнички Албанци, а на задната страна на маичката на албански јазик беа испишани зборовите „1 GJUHË, 1 KOMB, 1 GJAK“ („Еден јазик, еден народ, една крв“). Исто така, во текот на сценскиот настап, изведувачката на песната и двете танчерки неколку пати со рацете покажуваа симбол на двоглав орел. Дополнително, текстот на песната содржеше пораки кои повикуваат на експанзионизам и територијално обединување на земји и градови од регионот, вклучувајќи територии на Република Северна Македонија, Косово, Албанија и Црна Гора.При надзорот Агенцијата ги примени критериумите од Водичот за мониторинг на говорот на омраза, стандардите од Европската конвенција за човекови права и праксата на Европскиот суд за човекови права (случаите Рој ТВ против Данска и Зана против Турција). Притоа беше утврдено дека ограничувањето на ваквиот вид изразување е пропишано со закон, има легитимна цел (заштита на националната безбедност, јавниот ред и правата на другите) и е неопходно во едно демократско општество.Пикажувањето вакви содржини во програма наменета за најмладата публика, претставува обид за индоктринација со идеи кои се во директна спротивност со духот на соживотот и толеранцијата во нашето мултиетничко општество, а пренесувањето на пораките преку деца претставува нивна груба злоупотреба за политички цели.Фактот што спорните кадри и пораки поминале низ уредничкиот филтер на МРТ2 без да бидат отстранети, укажува на сериозен и системски пропуст во планирањето и уредувањето на програмата.Агенцијата потсетува дека Јавниот радиодифузен сервис има посебна одговорност да не дозволи злоупотреба на програмата за промоција на идеи кои го негираат суверенитетот и територијалниот интегритет на државата, и за поттикнување на културна, етничка, религиозна, полова, расна, национална или други форми на нетолеранција, како и дека МРТ е должна да обезбеди целосна заштита на малолетните лица во своите програми“, стои во соопштението.

Македонија | пред 2 седмици

АВМУ со жестока реакција до СДСМ: Политичките напади врз новинарите ја загрозуваат медиумската слобода

Агенцијата за аудио и аудиовизуелни медиумски услуги изразува сериозна загриженост за континуираните етикетирања и јавни напади од страна на политичката партија СДСМ, насочени кон одделни новинари и медиуми.„Агенцијата потсетува дека слободата на изразување, медиумскиот плурализам и уредувачката независност се темелни демократски вредности. Јавната комуникација, особено кога доаѓа од политички субјекти, мора да биде одговорна и да ја почитува улогата и автономијата на медиумите. Јавното дискредитирање или етикетирање на новинари и медиуми создава атмосфера на притисок, го поткопува јавниот дијалог и може директно да влијае врз безбедноста и професионалниот интегритет на новинарите.Медиумите не смеат да бидат третирани како политички противници, ниту да бидат вовлекувани во партиски или политички конфронтации. Напротив, тие треба да имаат можност непречено, слободно и без притисоци да ја извршуваат својата професионална улога, во интерес на јавноста и демократските процеси.Агенцијата ги повикува сите политички субјекти да се воздржат од реторика која придонесува за поларизација, притисок или дискредитација на медиумите и новинарите и да ја почитуваат нивната уставна и професионална улога во демократското општество“, се вели во соопштението.

Македонија | пред 2 месеци

Крај на „дивото“ инфлуенсерство: Инфлуенсерите со над 10.000 следбеници и заработка мора да се регистрираат во АВМУ

Агенцијата за аудио и аудиовизуелни медиумски услуги (АВМУ) денеска, 16 јануари 2026 година, упати јавен повик до сите инфлуенсери, јутјубери и влогери веднаш да го регулираат својот статус. Со последните законски измени, тие веќе не се сметаат само за хобисти, туку официјално се класифицирани како „даватели на аудиовизуелни медиумски услуги по барање“ и мора да се впишат во Регистарот на Агенцијата.Обврската произлегува од измените на медиумската легислатива донесени во јули 2023 година, со кои за првпат официјално се признава влијанието на креаторите на содржини на социјалните мрежи.АВМУ прецизираше кои инфлуенсери мора да се регистрираат. Обврската важи за физички лица кои ги исполнуваат сите следни критериуми:Објавуваат видеа на платформи како YouTube, Instagram, TikTok и слично.Имаат повеќе од 10.000 следбеници или претплатници.Остваруваат економски интерес од своите содржини.Во последните 12 месеци објавиле најмалку 24 аудиовизуелни содржини.Целта на содржините е да информираат, образуваат или забавуваат, а креаторот има уредничка одговорност за нив.Агенцијата апелира до сите кои ги исполнуваат овие услови да поднесат пријава што е можно поскоро. Формуларите и потребните документи се достапни на веб-страницата www.avmu.mk, во посебниот банер „Инфлуенсери/Влогери“. За дополнителни информации или нејаснотии, отворена е посебна електронска адреса: influenseri@avmu.mk.

Македонија | пред 3 месеци

АВМУ бара медиумите да го почитуваат изборниот молк

Од ноќеска на полноќ започна изборниот молк за вториот изборен круг, кој според Законот ќе трае до 19:00 часот на 2 ноември 2025.Агенцијата за аудио и аудиовизуелни медиумски услуги (АВМУ) известува дека за време на молкот медиумите можат да продолжат да известуваат за изборите и за текот на гласањето, но не смеат да емитуваат какви било облици на изборно медиумско претставување.,,При известувањето во деновите на изборниот молк ќе се смета дека медиумите го прекршиле изборниот молк доколку емитуваат, односно објават какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта”, стои во соопштението од АВМУ.Агенцијата очекува сите медиуми да ја прилагодат својата програма на правилата за изборниот молк.

Македонија | пред 5 месеци

Отфрлена тужбата на Левица за „цензурата“ преку необезбедување на простор за рекламирање, вели АВМУ

Управниот Суд, донесе Решение со кое ја отфрли тужбата на политичката партија Левица за поништување на Упатството за радиодифузерите за локалните избори 2025 година, донесено од Агенцијата за аудио и аудиовизуелни медиумски услуги, известија од институцијата.„Во образложението на Решението на Управниот суд, меѓу другото е наведено дека Агенцијата  „во согласност со своите надлежности како јавен орган донела Упатство со кое го пропишува начинот на постапување во извршувањето на одделни одредби од Изборниот законик“. Имено, со донесеното Упатство се појаснува начинот на примена на одредбите од Изборниот законик за распределба на времето за платено политичко рекламирање, распределба на времето во вестите кај Јавниот радиодифузен сервис, бесплатното политичко претставување на Собранискиот канал и за обезбедување пристапност на содржините за изборниот процес“, тврди Агенцијата за аудио и аудиовизуелни медиумски услуги.Тие додаваат: „Со ова, како и со претходно донесеното Решение на Основниот граѓански суд - со кое како неоснован се одбива предлогот на политичката партија Левица за издавање привремена мерка за забрана на доставување на Упатството до комерцијалните медиуми, како и за доставување на извештајот за емитуваното платено политичко рекламирање до ДИК - само уште еднаш се потврдува дека Агенцијата постапува согласно законските прописи и професионално ги спроведува законските решенија“.

Македонија | пред 6 месеци

АВМУ го осуди чинот на опожарување на возилото на сопственикот на регионалната телевизија од Штип

Агенцијата за аудио и аудиовизуелни медиумски услуги најостро го осудува чинот на опожарување на возилото на сопственикот на регионалната телевизија М-Нет ХД од Штип, Благој Серсемов, од страна на непознати сторители во дворот на неговата семејна куќа.Заканите и заплашувањата насочени кон медиумите ја поткопуваат демократијата, слободата на говорот и слободата на информирање. Безбедноста на медиумските работници е клучна за постоење на независни и професионални медиуми, кои се еден од главните стожери на демократските процеси и кои придонесуваат за унапредување на слободата на изразување, велат од АВМУ.Од таму апелираат до Министерството за внатрешни работи во најскоро време да го расчисти случајот и да ја информира јавноста за причините кои довеле до овој вандалски чин.

Македонија | пред 1 година