Граѓаните конечно ќе имаат каде достоинствено да ги закопаат своите миленици, Македонија ќе добие кафилерија и гробишта за миленици
Македонија конечно се приближува до системско решавање на долгогодишниот проблем со угинатите животни и починатите домашни миленици. До средината на 2026 година треба да бидат дефинирани локациите и инфраструктурата за изградба на кафилерија и гробишта за миленици, по што ќе започне и нивната практична реализација.Директорот на Агенцијата за храна и ветеринарство, Оливер Миланов, за МИА вели дека процесот е во интензивна фаза и дека станува збор за инфраструктура која одамна недостасува во земјава, а воедно претставува и услов во рамките на европските интеграции.Според него, со години наназад сопствениците на починати миленици биле приморани да ги оставаат телата на истите депонии каде што завршува и комуналниот отпад, што е недозволиво од здравствен и еколошки аспект. Новите гробишта, како и кафилеријата, ќе се градат надвор од урбаните средини, на ненаселени локации.Паралелно, се разгледува и модел според кој секоја општина би имала сопствено прифатилиште за бездомни кучиња, а каде што е возможно – и гробишта за миленици. Ова ќе биде една од темите на состанокот што АХВ ќе го одржи со министерот за локална самоуправа и со ЗЕЛС.Во однос на кафилеријата, Миланов потсетува дека идејата постои уште од 2019 година, но реализацијата била блокирана поради недостиг од соодветна локација и отпор од локалното население.– Првично се разгледуваа Лозово и Росоман, но советниците не дозволија поради недоволна информираност. Се мислеше дека ќе има горење со миризба, како во фабрика, а всушност станува збор за целосно херметички затворен систем – објаснува Миланов.Сега, додава тој, се оди кон јавно-приватно партнерство, а се анализира и европски модел со мобилна кафилерија, која овозможува преземање на трупот и негово уништување на точно утврдена локација.– Очекувам по празниците да седнеме со министрите и со советниците на премиерот и да го заокружиме моделот. Јас би сакал работите да почнат уште ова лето, барем со поставување темели – вели директорот на АХВ.Проблемот со бездомните кучиња, пак, останува еден од најгорливите. Според проценките, низ земјава талкаат повеќе од 8.000 кучиња без сопственик.Во таа насока, веќе е подготвен нов закон за здравствена заштита на животните, кој опфаќа и конкретни мерки за справување со ова прашање. Текстот е усогласен по повеќе состаноци со 11 невладини организации, меѓу кои и Анима мунди и Лајка.Законот предвидува казни за неодговорно сопствеништво, за шетање кучиња без поводник на јавни места, како и построги правила за големите и потенцијално опасни раси. Во процесот ќе бидат вклучени и ловечките друштва, а планирани се и јавни трибини со граѓаните и инспекторите од подрачните единици.
Македонија | пред 2 дена