лидија димова

Лидија Димова осудена на две години затвор за злоупотреба на службена положба

Основниот кривичен суд во Скопје ја прогласи за виновна поранешната директорка на Националната агенција за европски образовни програми и мобилност, Лидија Димова, за кривичното дело злоупотреба на службена положба и овластување. Таа е осудена на казна затвор од две години.Пресудата предвидува и парична обврска – Димова треба да плати судски паушал од 10 илјади денари, како и да ги покрие судските трошоци. Во рок од шест месеци таа е задолжена да ја врати и штетата настаната врз Националната агенција, во износ од 22,7 милиони денари.Судијката Фанка Јанчулева Михаиловска ја ослободи Димова од обвинението за измама, а третата обвинета, Ана Павлиду, одговорна за „несовесно работење во службата“.Во образложението беше наведено дека со несовесно и нестручно постапување Димова овозможила противправна корист за трети лица, што резултирало со штета од 2,818 илјади денари на европските фондови. „Кога станува збор за делото измама, недостига опис за тоа како конкретно е извршено и со кои лажни податоци е предизвикана штетата. Без вакви елементи нема основа за обвинение за измама, поради што судот мораше да донесе ослободителна одлука,“ појасни судијката.Обвинителката Сузана Мирческа Кузмановска го застапуваше обвинението, поднесено во јуни 2022 година.Според Обвинителството, во периодот од 2018 до 2020 година, како директорка на Агенцијата, Димова ја злоупотребила функцијата и овозможила значителна имотна корист за други лица. Таа постапувала спротивно на Законот за јавни набавки и на Законот за основање на Агенцијата, кршејќи ги принципите на законитост, еднаквост и јавност. Без да објави јавен конкурс, склучувала договори со надворешни лица кои ги ангажирала како експерти, обучувачи и соработници, при што ги дискриминирала потенцијалните кандидати.

Македонија | пред 3 месеци

(Видео) Се води постапка за фризерницата, пропустите се на страна на директорката Димова, вели обвинителката

Во случајот со доделувањето на средства на фризерницата, се води постапка во делот на одговорноста на ексдиректорката во Националаната агенција за европски образовни програми Лидија Димова, вели обвинителката Сузана Мирчевска-Кузмановска. Таа посочува дека е убедена во тоа дека разрешената директорка има одговорност во делот на јавните набавки и ангажирањето лица без огласи. Обвинителката вели: „Убедена сум дека ќе докажам“.„Се води постапка во делот на одговорноста на директорката Лидија Димова и тоа е содржано во обвинението за кое денеска имавме судење. За оној кој го добил грантот ја запрев истрагата уште кога го поднесов обвинението. Тоа значи дека грантовите, при доделувањето на грантовите, директорката има пропусти, односно не ја спровела постапката онака како што е предвидено со националното законодавство“, рече обвинителката Сузана Мирчевска-Кузмановска.Во судница, Димова се бранеше со документ од ОЛАФ во кој стои дека таа не направила злоупотреби. Но и ОЛАФ е дециден дека тоа не значи дека не го прекршило законодавството на Македонија.„Документот е краток, известување од ОЛАФ е. Истрагата која ја водела таа институција не утврдиле дека Лидија Димова како директорка на агенцијата направила злоупотреба на европските средства согласно нивните програми. Меѓутоа, таму е назначено дека ваквата констатација на ОЛАФ не значи задирање во евентуални постапки кои ги водат органите во матичната држава. Тоа значи дека по наоѓање на Обвинителството, пред при доделување на тие грантови за фризерницата, како што ја нарекувате, и неколку други ситуации, пропустите се на страна на директорката. За тоа се води постапка“, додава обвинителката.Обвинителката Сузана Мирческа Кузмановска поднесе обвинителен акт против Лидија Димова, разрешената директорка на Националната агенција за европски образовни програми и мобилност, Александар Гочев, тогашен нејзин близок соработник и Ана Павлиду, пензионира благајничка во институцијата. Според обвинителката, сите три лица оштетиле средства на европската заедница. Лидија Димова се гони дека со намера за друг да прибави имотна корист ја злоупотребила положбата и овластување па постапила спротивно на Законот за јавни набавки и Законот за основање на Национална агенција за европски образовни програми и мобилност. Таа ангажирала соработници во Агенцијата без да објави оглас, а меѓу нив е и ангажирањето на Зоран Златковски. Истовремено, Димова се гони и за исплаќањето на издатоци за службени патувања. Обвинителката бара одговорност од Димова и за склучени договори без јавни набавки.Скопско фризерско студио лоцирано во Аеродром, изминативе три години добивало грантови од над 270.000 евра преку програмата „Еразмус+“, која ја спроведува Националната агенција за европски образовни програми и мобилност, чиј директор е Лидија Димова.ДЕТАЛИ: https://a1on.mk/istrazjuvanja/skopska-frizernica-dobila-nad-270-000-evra-evropski-pari-za-edukacija/

Македонија | пред 1 година

(Видео) Сведоштво за присила од Лидија Димова и детали за трошењето буџетски пари: Знаеше дека фалат од благајна!

Сведокот Александар Гочев, ангажиран во Националната агенција за европски образовни програми и мобилност од разрешената директорка Лидија Димова, во судница раскажа за што се потрошиле 15.000 евра од благајната, зошто не се вратени, но и како спроведувал насоки од директорката. Пред Димова да го земе во Агенцијата, тој бил со неа и во Собрание, па сведочи дека на новото работно место бил канал за комуникација меѓу Димова и вработените. Призна дека ги подигал парите од благајна, па кажа дека Димова со присилба го натерала да потпише изјава дека таа не знаела.Гочев тврди дека парите се потрошени за опремување на новиот простор за Националната агенција, гориво и организирање на три настани. Кажа дека не постоел план како да се вратат парите потрошени за гориво и опремување, а за средствата потрошени за настаните посочи дека требало да ги даде фирмата која отпосле добила тендер – што според законите е исто така злоупотреба.„Од аспект на буџетски средства имаше предвидено, меѓутоа во процесот на формирање на јавната набавка, дел од работите кои се изведуваа не беа предвидени. Дел од средствата од благајната што недостасуваа се употребени за реновирање на зградата“, рече Гочев.Објасни и како фалеле пари за гориво. Бидејќи во таа ставка од буџетот немале средства, се земале од ставката за патувања.„Во буџетот за 2018 година не предвидела дилема дека ќе има четири возила, и предвидела гориво за околу 100.000 денари. Со оглед дека износот обезбеден не беше доволен за сите четири возила, горива за тие возила се дополнуваше со средствата кои беа во благајна, за кои можам да кажам дека до последен ден имало уредно, фискални сметки, кога и колку е наточено. Во вкупен износ од околу 8.000 евра“, додаде тој и објасни како тоа може да се докаже најлесно: „Во моментот кога возилата од моја страна се предадени, километражата vs искниженото гориво - има енормна разлика од тоа колку е платено...и таа разлика е платена од овие средства...“.Гочев имал факсимил од Лидија Димова, за кој сведочеше дека таа му го давала уште откако е истиот изготвен. Го користеле и други вработени. Со него, биле подигнувани средствата.„Писмена одлука за факсимилот никогаш немало за негова употреба. Тој е изработен во почетокот на нашето работење, за што има документи во Агенцијата, има фактура како е платен, нарачан, изработен. Факсимилот во мое ракување се наоѓа сѐ до мај 2018 година, а од самата изработка. Оттогаш, сум го користел, но не сум го поседувал. Директорката знаеше како се употребува овој факсимил“, објасни сведокот.Објасни и како со тие 15.000 евра биле покривани трошоци за настаните.„Во износ од 4.000 евра беа покриени и три настани кои беа одржани во Скопје. Имаше материјали за настаните, како се одржани, но никаде немаше информација како се платени. Тие се платени во кеш од благајната. Сметките се во агенцијата. А не фигурира дека се платени од агенцијата. Со моето заминување оставив папка со фактури и сметки, заедно со лаптопот кој го вратив. Знам дека формално не се искнижени ниту горивото, ниту настаните, како трошок на агенцијата. Фирмата која ги покриваше настаните, требаше да ги покрие настаните кои беа пред фирмата да започне да работи. За ниту едно подигање немало документација. Веројатно требало да има документација“, додаде Гочев.Пред да замине од Агенцијата, а со цел вината да не се префрли на други лица, Гочев објасни дека сакал да подигне кредит и да ги врати средствата, но Лидија Димова одбила да му потпише барање за кредит.„Заради моја лична грешка, кога сум имал намера да ги вратам назад во агенцијата, тоа е десет дена пред да заминам, поднесов барање за кредит, но не ми беше потпишан од директорката. Ова е откако видов кај кого ќе падне вината, поднесов барање за одобрување на кредитот“, додаде тој.Лидија Димова цело време знаеше дека фалат пари од благајна, тврди Гочев, па беше прашан од обвинетата зошто пред да замине од Агенцијата потпишал изјава дека таа не знаела, на што даде одговор.„Под присила ваша и на адвокатот присутен во канцеларијата, Стевица, доставив писмо. Миа Ношпал не беше. Апсолутно и под присила тогаш ме теравте да кажам дека Ана Павлиду и Дарко Димитров знаеле за тоа“, објасни Гочев.Во ова сведочење, тој кажа и дека секогаш ја известувал директорката за парите од благајната и недостатокот, дека истата ги одобрувала.

Македонија | пред 1 година

(Видео) Лидија Димова молчи и бега: како го присилувала сведокот да потпише изјава?

Обвинетата Лидија Димова која е разрешена директорка на Националната агенција за европски образовни програми и мобилност, без одговор како се местат тендери, а откако вакво обвинение против неа покрена обвинителката Сузана Мирческа Кузмановска. Во судница имаше тивки коментари за сведочењето на Александар Гочев кој тврди дека го присилила да потпише изјава дека таа не знаела оти тој незаконски подигнал средства од благајна, а надвор, бегаше од екипата на „Скопје1“.Надвор пак, ниту потврди, ниту негираше дека го направила тоа, а на прашањето како го присилила Гочев, имаше молк.Во судница, бранител и е и адвокатка, која доаѓа од адвокатска канцеларија што претходно ја застапување Агенцијата со која Димова раководеше. Но немаше одговор како се случила оваа „коинциденција“. Нејзината адвокатка, потоа кажа: „немаме одговор на поставените прашања“, а адвокатот додаде: „бевте во судница, видовте и слушнавте.. нема што да дополниме“.Иако има низа неодговорени прашања од Димова, особено за злоупотреби, таа одби да гостува во подкастот „Претрес со Ландов“, каде беше поканета да си ја каже својата страна од приказната. Прво побара во студиото да биде повикан Александар Гочев кој денеска сведочеше против неа, а откако кажавме дека ќе го сториле тоа, спушти слушалка.Обвинителката Сузана Мирческа Кузмановска поднесе обвинителен акт против Лидија Димова, разрешената директорка на Националната агенција за европски образовни програми и мобилност, Александар Гочев, тогашен нејзин близок соработник и Ана Павлиду, пензионира благајничка во институцијата. Според обвинителката, сите три лица оштетиле средства на европската заедница. Лидија Димова се гони дека со намера за друг да прибави имотна корист ја злоупотребила положбата и овластување па постапила спротивно на Законот за јавни набавки и Законот за основање на Национална агенција за европски образовни програми и мобилност. Таа ангажирала соработници во Агенцијата без да објави оглас, а меѓу нив е и ангажирањето на Зоран Златковски. Истовремено, Димова се гони и за исплаќањето на издатоци за службени патувања. Обвинителката бара одговорност од Димова и за склучени договори без јавни набавки.

Македонија | пред 1 година