операции на срце

СДСМ: „Ако е утврдена одговорност – зошто се кријат имињата на клиниките и лекарите?“

На прес-конференција, портпаролката на СДСМ, Богданка Кузеска, упати силна критика кон министерот за здравство Азир Алиу, обвинувајќи го дека начинот на кој го презентирал прелиминарниот извештај за непотребни кардиоваскуларни операции во приватни клиники создава сериозни сомнежи за прикривање на одговорност.Кузеска потсети дека самиот министер јавно изјавил оти комисијата „утврдила“ најмалку десет случаи на непотребни интервенции, но истовремено тврдеше дека извештајот не е финален – токму поради тоа имињата на клиниките и лекарите не се соопштуваат.„Како може нешто да биде утврдено, а да не биде финално? Што се чека за ’финалната фаза‘? Што ќе се менува и што се договара додека јавноста чека?“ – праша портпаролката, додавајќи дека таквото однесување остава простор за манипулации и можни договори зад затворени врати.СДСМ смета дека со тоа се испраќа погрешен сигнал дека можни виновници се штитат, а не се обезбедува транспарентност во исклучително сериозен скандал кој ја потресе јавноста.„Ако има лица кои погрешиле – мора да се именуваат. Ако има клиники што вршеле непотребни операции – мора да бидат објавени. Сѐ друго значи сомнеж, сенка, амнестија,“ рече Кузеска.Партијата нагласи дека огромното мнозинство медицинари работат чесно и професионално, но дека министерот, со тоа што не ги објавува наодите, всушност ги става сите под сомнеж и го руши угледот на здравствениот систем.СДСМ бара итно и целосно објавување на извештајот во фазата во која се наоѓа, без селекции и преправки, вклучително и:имињата на клиниките што ги извршувале спорните операции,сите членови на комисии, консилиуми и управители кои носеле одлуки за упатување и оперирање пациенти,активација на Јавното обвинителство, ДКСК и Финансиската полиција поради сомнежи за коруптивни практики и незаконско профитирање,како и обезбедување правна и психолошка поддршка за пациентите и нивните семејства.„Само целосна транспарентност може да ја зачува довербата во здравството. Сѐ друго е удар врз системот,“ заклучи Кузеска.

Македонија | пред 2 месеци

Каде биле извршени непотребните операции на срце и кој е одговорен? СДСМ за скандалот во здравството

СДСМ реагира со остар став по обелоденувањето на податоците дека 10 пациенти биле подложени на операции на срце без медицинска потреба. Од партијата велат дека скандалот е крајно загрижувачки и бараат итна и целосна транспарентност — вклучително и објавување на тоа во кои клиники и од кои лекари биле направени спорните интервенции.Од СДСМ потсетуваат дека министерот за здравство Азир Алиу веќе утврдил дека станува збор за десет случаи на непотребни операции или непотребно упатување на операции, но сè уште не објавил кои здравствени установи и кои доктори се одговорни за ваквите постапки. Според партијата, тоа е „апсолутно недозволиво“.Тие оценуваат дека објаснувањето на министерот — дека имињата нема да се откриваат затоа што извештајот не е конечен — отвора простор за манипулација со факти, како и за промена на наодите под притисок. Во реакцијата се поставува прашањето дали министерот намерно одложува соопштување за да може да „преговара или разговара“ со оние што ги извршиле интервенциите.СДСМ предупредува дека е нелогично истовремено да се тврди оти е докажано дека операциите биле непотребни, а извештајот да се означува како „прелиминарен“. Ако наодите се веќе утврдени, велат од партијата, нема ниту една причина тие да не бидат објавени — додека истрагата може да продолжи понатаму.Во писмената реакција се оценува дека однесувањето на Алиу е „крајно несериозно“ и дека создава сомнеж дека нешто се прикрива, што дополнително ја нарушува довербата во здравството и ги става здравствените работници под неоправдан притисок.СДСМ бара итно објавување на досегашниот извештај на комисијата, како и прецизно објавување на:клиниките каде се извршени спорните операции,сите поединечно инволвирани во донесување одлука за операција на пациентите,наодите за секој случај за кој, според министерот, е веќе утврдено дека не требало да биде опериран.Партијата смета дека секое понатамошно одложување ќе создаде сомнеж дека се врши манипулација со конечната верзија на извештајот, со што неоправдано се етикетира целиот здравствен систем, наместо да се лоцира индивидуалната одговорност.Реакцијата е потпишана од Центарот за комуникации со јавноста на СДСМ.

Македонија | пред 2 месеци

Десет пациенти биле ставени „под нож“ за операции на срце без медицинска индикација, што друго открива Комисијата на МЗ

Нов алармантен извештај на Комисијата формирана од Министерството за здравство го тресе македонското најчувствителниот сектор повторно. Од 25 пријавени случаи за сомнителни кардиолошки и кардиохируршки интервенции, десет пациенти биле оперирани или упатени на операција без оправдана медицинска индикација. Ова го утврди специјалната комисија што ја формираше Министерството за здравство по јавните обвинувања за злоупотреби во кардиохирургијата.Контроверзите почнаа уште во август, кога кардиологот проф. д-р Сашко Кедев во гостување на „Канал 77“ предупреди дека во приватниот сектор се вршат непотребни операции на срце — исклучиво за профит. Министерот за здравство Азир Алиу веднаш по изјавата назначи интерна комисија, но таа одлучи да ги испита сите болници што вршат кардиохируршки интервенции — и приватни и државни.Иако извештајот потврди дека дел од пациентите навистина биле погрешно водени, комисијата денеска не кажа во кои болници се случиле спорните операции. Не се откри ни дали интервенциите претставувале ризик по живот, ниту дали имало компликации, ниту колку чинеле за државниот буџет.Претставниците на комисијата најавија дека следниот чекор е ангажирање тројца странски експерти, кои ќе ги разгледаат сите предмети пред да биде составен финален извештај.„Досегашните наоди покажуваат неправилни упатувања и неправилно изведени операции. Ќе продолжиме да работиме по утврдената методологија“, изјави кардиологот д-р Ненси Лозанче.Министерот Алиу нагласи дека ова е само прелиминарен документ и дека конечниот извештај ќе биде основа за креирање нови здравствени политики.Комисијата започна со работа откако во Фондот за здравство пристигнаа 25 пријави од болници и физички лица за сомнителни интервенции поврзани со коронарни и периферни васкуларни болести. Од нив, 19 случаи биле анализирани, а шест се препратени до Државниот здравствен и санитарен инспекторат за понатамошна постапка.

Македонија | пред 2 месеци