Снопче бара промена на спомен-плочата за Вејце: „УЧК не се терористи“
Пратеникот од Алијанса за Албанците, Халил Снопче, побара итна промена на текстот на спомен-плочата за загинатите кај Вејце, оценувајќи дека формулацијата со која припадниците на УЧК се нарекуваат „терористи“ е навредлива и неприфатлива.Реакцијата следи по објавата на министерот за одбрана, Владо Мисајловски, кој на годишнината од настанот положи цвеќе пред спомен-обележјето во касарната „Илинден“ во Скопје.Снопче во јавната реакција посочи дека натписот „паднати во војна против албанските терористи“ претставува, како што наведе, „отворена рана“ за многу семејства и порака која ја продлабочува поделбата во општеството. Тој праша како може да се зборува за соживот и европска иднина додека, според него, во институциите постојат формулации што навредуваат дел од граѓаните.„УЧК и нејзините борци не се терористи. Тие се дел од нашата историја“, наведува Снопче, барајќи текстот на спомен-плочата да биде изменет.Од друга страна, Мисајловски во својата објава истакна дека со полагањето цвеќе се оддава почит на загинатите припадници на безбедносните сили, нагласувајќи дека нивната жртва останува трајно врежана во колективното сеќавање.Настанот кај Вејце се случи на 28 април 2001 година, кога загинаа осум припадници на безбедносните сили – четворица од армиската единица „Волци“ и четворица полициски службеници. Спомен-обележјето во касарната „Илинден“ е посветено на нивниот спомен.
Македонија | пред 3 седмици
