СВЕТИ НИКОЛЕ

Бремената партнерка ја онесвестил од тепање, па ја заклучил во соба: Обвинение за 21-годишник од Свети Николе

Основното јавно обвинителство Свети Николе поднесе обвинение против 21-годишник за нанесување телесна повреда при семејно насилство, како и за противправно лишување од слобода, информираат од обвинителството.Според обвинението, на 19 и 20 февруари во семејната куќа во Свети Николе, обвинетиот при вршење семејно насилство ја ограничил слободата на движење и телесно ја повредил неговата бремена девојка, со која живеел во семејна заедница.Тој, според наводите, најпрво ја навредувал, а потоа започнал да ја удира со тупаници. Кога девојката се онесвестила од ударите, ја однел во бањата каде што ја освестил со ладна вода, по што повторно почнал да ја удира и да ја влече за коса, нанесувајќи ѝ повеќе телесни повреди по главата и телото.Кога оштетената се обидела да избега, обвинетиот ѝ го одзел мобилниот телефон и ја заклучил во спалната соба, каде што ја држел околу 15 часа спротивно на нејзината волја.Јавниот обвинител, заедно со обвинението, поднел и предлог за определување мерка притвор за обвинетиот. Во меѓувреме, се вршат дополнителни проверки во однос на наводи и сомненија за други злоупотреби од страна на истото лице кон оштетената, кои произлегуваат од нејзиниот исказ даден пред јавниот обвинител.

Македонија | пред 1 седмица

Повеќе од една година без трага: Каде исчезна Злата Јанкова?

Потрагата по Злата Јанкова од селото Орел, општина Свети Николе, сè уште трае. Жената последен пат е видена на 16 јуни 2024 година, околу 15 часот, по што ѝ се губи секаква трага. На социјалните мрежи постојано кружи апел со повик до граѓаните, доколку имаат какви било информации, да се јават во Министерство за внатрешни работи или на телефонските броеви наведени во објавата.„Исчезнато е лицето Злата Јанкова последен пат е видена на 16.06.2024 во 15 часот во село Орел-Св.Николе За било какви информации пријавете во МВР или на 078828477 и 071686952“, стои во апелот на социјалните мрежи.Иако помина повеќе од една година од нејзиното исчезнување, семејството не се откажува од надежта дека Злата е жива. Судбината на мајка, сопруга и домаќинка повеќе од дванаесет месеци останува непозната, а одговорите што ги очекуваат – недостижни.Сопругот Дејан Јанковски јавно сведочеше и дека во семејството немало никакви проблеми што би укажале на можност Злата самата да си наштети или да замине. Напротив, таа била целосно посветена на семејството и на воспитувањето на нивните двајца синови. По нејзиното исчезнување, домот, како што вели тој, е исполнет со тишина и страв, а чувството на празнина станало секојдневие.Дејан за „Женски магазин“ раскажуваше дека денот кога Злата последен пат била видена бил сосема обичен. По попладневниот одмор тој заминал да работи во пластениците, додека таа тргнала кон домот за да ги заврши секојдневните обврски. По нејзиното заминување од куќата, била забележана од сосетка, што претставува последниот потврден момент во кој Злата е видена жива.И покрај сите наведени активности, потрагата по Злата Јанкова сè уште не дала резултат. Повеќе од една година подоцна, нејзината судбина останува мистерија, а семејството живее без одговори и без чувство дека државата стои цврсто зад нив.

Македонија | пред 2 месеци