„Пак манипуација од Мицкоски – проневера од 5,5 милиони евра мора Обвинителство да постапи, а не ДКСК само за едно лице“, велат од СДСМ

СДСМ преку соопштение бара Јавното обвинителство да отвори предмет за наводната проневера од 5,5 милиони евра поврзана со прославата, оценувајќи дека постапката на ДКСК за можен судир на интереси кај едно лице не е истрага за целиот случај.

Од СДСМ велат дека учеството на член на Комисијата како изведувач претставува само еден сегмент од случајот и дека е потребно да се испита текот на парите, како и начинот на кој биле носени одлуките.

— реклама —

Партијата обвинува дека Христијан Мицкоски ја довел јавноста во заблуда кога изјавил дека прославата чинела „нула денари“, а потоа, како што наведуваат, биле објавени информации дека биле потрошени 5,5 милиони евра. СДСМ тврди и дека не се објавуваат документи, договори, анекси, исплати и фактури, како и информации за платениот данок.

Од партијата бараат да се утврди каде завршиле средствата и поставуваат низа прашања: каде е одлуката на Собранието на акционери на Лотарија, кој го одобрил трошењето на над 300 милиони денари, кога и врз основа на кој закон била донесена одлуката и кој гласал за неа.

— реклама —

СДСМ прашува и како јавниот повик можел да трае само пет работни дена со пристигната една понуда, а по само три дена да биде најавен настапот на Дејвид Гета. Партијата бара да се утврди колку чинел настапот, кога и од кого бил договорен и кога бил исплатен.

— реклама —

Дополнително, СДСМ бара одговори за приходите на „Стардаст“, односно „Авалон“, начинот на исплата додека компанијата имала блокирана сметка, како и дали бил платен данок.

Од партијата прашуваат и каде завршиле приближно 1,75 милиони денари од продадените билети и дали за тие приходи бил платен данок.

„СДСМ бара целосна истрага од Јавното обвинителство“, се наведува во соопштението, во кое партијата додава дека граѓаните имаат право да знаат како биле потрошени нивните пари.

На крајот, СДСМ порачува дека „доаѓа времето на вистината и правдата“.