Македонија ќе добие 140 милиони евра во рамки на Планот за раст на Европската Унија, откако успешно спровела дел од предвидените реформски мерки, изјави австрискиот амбасадор во земјава Мартин Памер.
„Македонија направи одлична работа во однос на Планот за раст и благодарение на тоа на земјата ќе ѝ бидат алоцирани 140 милиони евра за да се придонесе за натамошниот напредок“, рече Памер на денешниот настан на иницијативата „Славков 3“ во Европската куќа во Скопје.
Австрискиот амбасадор оцени дека е важно земјата да го задржи реформското темпо и да продолжи посветено со процесот на европска интеграција. Според него, во Европската Унија во моментов постои зголемен интерес за проширувањето, при што, за разлика од претходниот период, се разговара и за конкретни земји што би можеле да станат членки.
На 27 септември во Виена ќе се одржи министерска конференција меѓу земјите од Западен Балкан и Австрија, Чешка и Словачка, во рамки на форматот „Славков 3“. На средбата ќе се разговара за напредокот на земјите од регионот кон ЕУ и за продолжување на реформскиот процес.
Во однос на новата стратегија за проширување на ЕУ, која се очекува да биде објавена на 30 септември, Памер истакна дека разговорите за различните предлози сè уште траат.
Како конкретна придобивка од приближувањето кон ЕУ, тој го посочи и приклучувањето кон Единствениот европски платежен систем – SEPA, што овозможува пониски трошоци за трансфери и плаќања.
Памер најави и понатамошни чекори кон укинување на роаминг-трошоците меѓу Македонија и Европската Унија.
„Она што допрва следи, иако спроведувањето не е едноставно, е зоната без роаминг во ЕУ. Тоа значи дека наскоро, веројатно во рок од една или две години, повеќе нема да има трошоци за роаминг“, рече Памер.
Форматот „Славков 3“ го сочинуваат Австрија, Чешка и Словачка, а е воспоставен пред 11 години со цел координација и соработка меѓу трите земји, вклучително и во однос на политиките на ЕУ и проширувањето.
Во рамки на активностите се реализираат и проекти за изградба и обновување на планинарски патеки на Водно, Титов Врв, Шар Планина и Пелистер.
Заменичката амбасадорка на Чешка, Андреа Штајнер Вотавова, изјави дека целта на форматот „Славков“ е европските приоритети да се поврзат со конкретни резултати за граѓаните. Како пример ја посочи планинарската патека од Долно Соње до врвот на Водно, финансирана од Чешка, која беше завршена минатата година и веќе ја користат локалното население и посетителите.
Таа повтори дека Австрија, Чешка и Словачка ја поддржуваат европската интеграција на Западен Балкан и процесот на проширување заснован на исполнување на критериумите.
