Патници пронашле змија во преградата за багаж во авион во Италија

Патниците на летот од Лампедуза до Палермо доживеале необична ситуација откако во преградата за рачен багаж во авионот пронашле змија.

— реклама —

Змијата била забележана во завршната фаза од летот, а патниците веднаш го известиле екипажот. Капетанот ја контактирал полицијата, па по слетувањето на аеродромот „Фалконе е Борселино“ авионот го пречекале надлежните служби.

— реклама —

Во авионот влегле карабинери и припадници на шумската полиција, кои ја презеле змијата. Било утврдено дека станува збор за видот Macroprotodon cf. cucullatus, карактеристичен за фауната на Лампедуза. Островот е единственото место во Европа каде што е регистрирана популација од овој вид, кој претежно живее во Северна Африка.

— реклама —

Италијанските карабинери започнале истрага за да утврдат како змијата завршила во авионот и дали некој ја пренесувал. Животното му било предадено на професор од Универзитетот во Палермо, специјалист за влекачи, кој ќе ја процени неговата здравствена состојба.

По ветеринарните прегледи, змијата треба да биде вратена на Лампедуза и пуштена во нејзиното природно живеалиште.