Пцовки, кавги, напната атмосфера и навреди, СДСМ бара извинување од Стоиљковиќ и Мицкоски

Жестока атмосфера во собраниската сала. Пратениците на СДСМ ја напуштија салата откако побараа и не добија извинување од премиерот Христијан Мицкоски и кандидатот за министер Иван Стоилковиќ, како и реакција од претседателот на Собранието Африм Гаши, поради, како што кажаа, навреди и непримерно однесување кон пратеници на СДСМ
опозициската партија за време на собраниската дебата.

СДСМ рекоа дека однесувањето е надвор од сите демократски критериуми, особено затоа што во нив биле вклучени претседателот на Владата и кандидат за министер.

— реклама —

Имало и директен напад од кандидатот за министер за локална самоуправа Иван Стоилковиќ, кој се нафрлил на двајца пратеници со навреди и пцовки.

— реклама —

СДСМ на прес-конференција рекоа дека ваквото однесување не му доликува на кандидат за министер.

„Тоа претставува говор на омраза што може да роди насилство. И тоа што следеше по прекинување на седницата беше вистински напад, не само вербален, од страна на кандидатот за министер Иван Стоилковиќ, кој се нафрли врз двајцата пратеници, не само физички, вербално, туку и со пцовки. Мислам дека тоа не доликува на кандидат за министер, кој треба ова Собрание да го избере“, рече координаторот Оливер Спасовски.

— реклама —

Од СДСМ го критикуваа и молчењето на претседателот на Собранието Африм Гаши, кој, како што велат, не реагирал иако претседавал со седницата. Според партијата, Гаши бил должен да реагира бидејќи изнесените навреди не биле во согласност со Деловникот, ниту со Етичкиот кодекс што Собранието го усвоило едногласно.

Повод за кавгата беше оценката на пратеникот на СДСМ, Митко Трајчулески, дека реконструкцијата на Владата не носи нова визија, туку отвора сериозни дилеми за стратешката определба на државата и за кадрите што ВМРО ги предлага на највисоки државни функции.

„Очекувано е назначувањето на Стоилковиќ за министер за локална самоуправа, со што „српскиот“ свет во Македонија добива позиција губернатор на 80 македонски општини”, рече Трајчулески.