Кина повика на изнаоѓање соодветно решение за нормализирање на состојбата во Ормускиот теснец, нагласувајќи дека безбедната и непречена пловидба низ оваа стратешка морска рута е од интерес за целата меѓународна заедница.
Портпаролот на кинеското Министерство за надворешни работи, Гуо Џиакун, изјави дека Ормутскиот Теснец е меѓународен поморски премин и дека е неопходно што поскоро да се обнови сигурната и слободна пловидба.
„Потребно е соодветно решение кое ќе ги надмине нарушувањата во Ормутскиот Теснец и ќе одговори на загриженоста на меѓународната заедница“, изјави Гуо.
Изјавата на Пекинг доаѓа по индиректните разговори меѓу САД и Иран, одржани во Доха со посредство на Катар и Пакистан.
Преговорите се дел од меморандумот за разбирање потпишан на 17 јуни во Исламабад, чија цел е трајно ставање крај на конфликтот што започна на 28 февруари. Според договорената рамка, двете страни имаат рок од 60 дена за завршување на преговорите.
Меѓу темите опфатени со рамковниот договор е и повторното отворање на Ормутскиот Теснец, кој претставува една од најважните светски рути за транспорт на нафта.
Разговорите меѓу Вашингтон и Техеран треба да продолжат во третата недела од јули.
По американско-израелските напади, Иран го затвори Ормускиот теснец, додека американските сили воведоа блокада на иранските пристаништа. По потпишувањето на меморандумот, САД ја укинаа блокадата, а Иран ги ублажи ограничувањата за пловидба, но инсистира бродовите да се движат по рута определена од иранските власти.
Кина соопшти дека е подготвена да ја продолжи комуникацијата со засегнатите држави и со меѓународната заедница со цел да се обезбеди стабилност во регионот.
