Најмалку 18 лица, вклучувајќи и две деца, загинаа денеска во воздушен напад врз иранската провинција Алборз, додека најмалку 24 лица се повредени, пренесуваат светските новински агенции и иранските државни медиуми.
Нападите, според достапните информации, погодиле густо населени станбени области во провинцијата која се наоѓа северно од Техеран. Сите повредени се пренесени во локални медицински центри, а се стравува дека бројот на жртви може да расте.
Според извештаите, меѓу загинатите се и две бебиња.
Покрај Алборз, забележани се и напади врз петрохемиски постројки во Шираз, како и на аеродромот во Хорамабад. Израелската војска издаде и итно предупредување до иранските цивили да избегнуваат железничка инфраструктура, наведувајќи дека таа би можела да биде цел на идни напади.
Иранскиот претседател Масуд Пезешкијан порача дека милиони граѓани се подготвени да ја бранат земјата, наведувајќи дека повеќе од 14 милиони Иранци доброволно се пријавиле за одбрана.
„Повеќе од 14 милиони горди Иранци до сега изразија спремност да го жртвуваат својот живот за одбрана на Иран. И јас бев, сум и ќе бидам подготвен да го жртвувам својот живот за Иран“, напиша Пезешкијан на платформата X.
Во меѓувреме, дипломатските напори за постигнување прекин на огнот се во тек. Посредници од Пакистан и други земји се обидуваат да започнат преговори, но Иран засега ги одбива таквите иницијативи.
