Американскиот Пентагон побара од одбранбената индустрија значително да го забрза производството на оружје и муниција, со цел да се надополнат намалените воени резерви.
Портпаролот на Пентагон, Шон Парнел, изјави дека Министерството за одбрана се фокусира на забрзување на набавките за американските војници да го добијат потребното оружје во согласност со безбедносните закани.
Заменик-министерот за одбрана Стив Фајнберг минатата недела испратил допис до раководителите на одбранбената индустрија, со рок од најмногу 21 ден да достават планови за значително побрза испорака и зголемување на производството на клучни воени системи.
Барањето доаѓа во период кога американските резерви на напредни ракетни пресретнувачи се дополнително намалени по конфликтот со Иран. Според анализа на Центарот за стратешки и меѓународни студии (CSIS), резервите на пресретнувачи за системот „Патриот“ се намалиле за најмалку 65 отсто во однос на периодот пред конфликтот.
И резервите на пресретнувачи за системот THAAD се значително пониски во споредба со состојбата пред конфликтот, иако САД успеале делумно да ги надополнат.
Американскиот претседател Доналд Трамп неодамна ги отфрли тврдењата дека земјата се соочува со недостиг на муниција, наведувајќи дека САД располагаат со големи количества оружје и дека производството продолжува.
Од Пентагон, сепак, потврдија дека дописот за забрзување на производството е автентичен и дека тој ќе биде земен предвид при подготовката на идниот буџет за одбраната.
