Тивок бунт во Пентагон: Се собираат докази за смена на министерот Хегсет

Американскиот министер за одбрана Пит Хегсет се соочува со сериозен внатрешен отпор во Пентагон откако група активни и пензионирани воени и цивилни функционери тајно собирале документи за кои тврдат дека го компромитираат неговото работење. Според пишувањето на „Дејли мејл“, материјалите се чуваат на три различни локации низ САД, а целта е да се искористат за негово отстранување од функцијата.

— реклама —

Станува збор за електронски пораки, внатрешни белешки и записи од состаноци, собирани во изминатите 22 месеци. Според неименувани извори, документите покажуваат дека Хегсет и неговиот најтесен круг ги игнорирале правните и стратешките совети, ги навредувале експертите, криеле информации од Конгресот и им се заканувале на подредените кои ги сметале за нелојални или несоодветни.

Материјалите се чуваат во сеф во Северна Вирџинија, во банкарски сеф во Вашингтон и на западниот брег на САД. Функционери кои учествувале во нивното собирање се надеваат дека документацијата, заедно со списокот на клучни сведоци, би можела да им послужи на демократите доколку ја преземат контролата врз Претставничкиот дом и покренат постапка за отповикување.

— реклама —

Незадоволството во Пентагон, според извештајот, започнало уште на почетокот на мандатот на Хегсет. Особено внимание предизвикала улогата на неговата сопруга Џенифер, поранешна продуцентка на „Фокс њуз“, која учествувала во шифрирани разговори на апликацијата „Сигнал“ за американските напади врз Хутите во Јемен во март 2025 година. Поради честото присуство на состаноците на сопругот, во Пентагон наводно го добила прекарот „Јоко Оно“.

— реклама —

Во текот на 2025 година следувале бројни кадровски промени, меѓу кои и разрешувања на високи воени функционери, команданти и цивилни службеници. Последниот случај, според текстот, бил разрешувањето на генералот Брет Силвија од функцијата поврзана со стратегијата, по обвинувања дека на новинари им откривал доверливи информации за војните во Иран и Украина.

Изворите наведуваат и дека Хегсет ја прикривал вистинската состојба на американските воени операции во Иран. И покрај неговите тврдења за победа, војската наводно била неподготвена, американските бази на Блискиот Исток претрпеле сериозни оштетувања, а резервите на клучна муниција биле значително намалени.

— реклама —

Дополнително, и покрај предупредувањата дека продолжувањето на судирот не е одржливо, Хегсет наводно претставил план со кој воените бази треба да се подготват за 90 дена работа без надворешно снабдување со енергија, вода и други потребни ресурси.