Пентагон го ограничи јавниот пристап до некласифицираните извештаи за тестирање на американското оружје, наведувајќи дека странски противници би можеле со помош на вештачка интелигенција да ги анализираат и да ги откријат слабостите на американските одбранбени системи.
Одлуката ја донела директорката на Канцеларијата за тестирање и евалуација на оружјето, Ејми Хенингер, а Министерството за одбрана на САД ја оцени како превентивна мерка за зајакнување на националната безбедност.
Извештаите, кои повеќе од 25 години беа јавно достапни, сега се префрлени на заштитена мрежа и можат да ги користат само овластени лица со посебни безбедносни дозволи.
Документите содржеа информации за сигурноста, одржувањето и техничките проблеми на голем број американски воени програми, меѓу кои и програмата за борбениот авион Ф-35.
Одлуката предизвика критики од дел од американските законодавци и организации за надзор на работата на владата. Сенаторката Елизабет Ворен предупреди дека ограничувањето на пристапот до ваквите информации може да ја намали транспарентноста и да влијае врз безбедноста на припадниците на вооружените сили.
Од Пентагон тврдат дека извештаите не се сокриени, туку само се преместени на побезбедна локација за да се спречи нивна злоупотреба.
