Американскиот министер за одбрана Пит Хегсет најави задолжително тестирање на нивото на тестостерон за сите припадници на вооружените сили постари од 30 години. Според најавата, војниците кај кои ќе биде утврдено ниско ниво на овој хормон ќе можат да започнат терапија за негова замена.
Хегсет изјави дека мерката има цел да ја подобри подготвеноста на војниците и да ја зачува, како што рече, „тактичката предност“ на американската армија. Засега Пентагон не објави детали за тоа како ќе се спроведува тестирањето кај околу 1,3 милиони активни припадници на војската.
Сепак, бројни лекари предупредуваат дека ниското ниво на тестостерон само по себе не значи дека е неопходно лекување. Според нив, терапијата треба да се препишува само кога, покрај лабораториски потврдените вредности, се присутни и симптоми како намалено либидо, замор или губење на мускулната маса.
Експертите предупредуваат дека непотребната терапија може да предизвика сериозни несакани последици, меѓу кои намалена плодност, значително намален број сперматозоиди, намалување на тестисите, нарушувања на срцевиот ритам, згрутчување на крвта и зголемување на градите кај мажите.
Според уролозите, терапијата со тестостерон најчесто претставува долгорочна, а неретко и доживотна обврска, бидејќи организмот со текот на времето ја намалува сопствената продукција на хормонот. Тие предупредуваат и дека масовното тестирање може да доведе до погрешни дијагнози и лекување на лица кај кои тоа не е медицински оправдано.
Во Соединетите Американски Држави во последните години значително е зголемен бројот на луѓе кои користат терапија со тестостерон, поттикнат и од нејзината популаризација на социјалните мрежи и од јавни личности кои отворено зборуваат за нејзината употреба. Сепак, медицинските здруженија и понатаму препорачуваат ваквата терапија да се применува исклучиво кога за тоа постојат јасни медицински индикации.
