Министерот за локална самоуправа, Златко Перински остварил работна средба со Стопанска комора на Република Северна Македонија и нејзиниот претседател Бранко Азески, на која се разговарало за унапредување на соработката меѓу институциите, со акцент на локалниот економски развој и инфраструктурните инвестиции.
На средбата било оценето дека модерните и функционални општини се клучен предуслов за конкурентна економија, привлекување инвестиции и рамномерен регионален развој.
Во фокусот на разговорите биле процесот на децентрализација, можностите за заедничко користење фондови, како и продлабочување на соработката меѓу Комората, општините и планските региони.
„Локалната самоуправа претставува важен партнер во создавањето поволна и предвидлива средина за развој на приватниот сектор, особено преку ефикасно спроведување на надлежностите, поквалитетни услуги и создавање подобри услови за работа и развој“, изјавил Перински.
Посебен акцент бил ставен на дигитализацијата на локалните услуги, при што било посочено дека дигиталната трансформација на општините значи поефикасни институции и подобра деловна клима за компаниите.
Соговорниците разговарале и за ажурирањето на базите на даночни обврзници, при што била нагласена потребата од фер и транспарентен систем, подобра наплата на локалните приходи и нивно насочување кон услуги и инфраструктура.
Во делот на рамномерниот регионален развој било отворено и прашањето за учеството на бизнис-заедницата во креирањето локални и регионални политики. Притоа било истакнато дека претставници на бизнис-секторот веќе се вклучени во Советите за развој на планските региони.
Министерот Перински порачал дека Министерство за локална самоуправа ќе продолжи да поддржува иницијативи насочени кон поефикасни општини и подобри услуги за граѓаните и компаниите.
