Лекувањата во странство, контролата на боледувањата во земјава и трошоците за ортопедски помагала ќе бидат трите главни приоритети на новото раководство на Фондот за здравствено осигурување (ФЗО), најави директорот Златко Перински.
На денешниот брифинг со новинарите, Перински, кој ја извршува функцијата од 13 јули, се осврна на последниот извештај на Државниот завод за ревизија за работењето на Фондот во 2024 година и најави засилени контроли во областите што со години се посочуваат како најпроблематични.
Тој информираше дека ФЗО во изминатиот период исплатил околу 500 милиони денари, односно повеќе од осум милиони евра, за лекување на пациенти во странство.
Осврнувајќи се на боледувањата, Перински потсети дека Министерството за здравство и ФЗО веќе подготвиле предлози за промени, кои се доставени до лекарските комисии, Лекарската комора, Здружението на приватни лекари и Здружението на приватни гинеколози.
„Целта е системот на боледувања да биде поедноставен, побрз, потранспарентен и поотпорен на злоупотреби, истовремено обезбедувајќи соодветна заштита на работниците кои навистина имаат потреба од привремена спреченост за работа“, изјави Перински.
Тој нагласи дека Фондот ќе работи на засилување на контролите и поефикасно управување со средствата во областите што ревизорите ги идентификувале како најризични.
