Министерот за локална самоуправа, Златко Перински, при работната посета на Општина Петровец порача дека Владата, покрај финансиската поддршка, обезбедува и стручна помош за општините со цел зајакнување на нивните капацитети и подобрување на услугите за граѓаните.
За време на посетата, Перински оствари средба со градоначалникот Борче Митевски, членовите на Советот и општинската администрација, при што се разговараше за актуелните потреби и предизвици со кои се соочува општината.
На состанокот биле разгледани можностите што ги нуди Ресурсниот центар за поддршка на општините, особено во делот на јакнењето на административните капацитети и унапредувањето на квалитетот на локалните услуги.
Посебен акцент бил ставен и на ажурирањето на базите на даночни обврзници, процес кој, според Министерството, е еден од клучните предуслови за зголемување на сопствените приходи на општините и обезбедување поодржливо локално финансирање.
„Директната комуникација со општините е најдобриот начин да ги препознаеме реалните потреби и предизвици со кои се соочуваат. Редовно сме на терен и работиме заедно со локалните власти на изнаоѓање конкретни решенија. Ресурсниот центар е воспоставен да биде практична поддршка за општините и да им помогне поуспешно да ги извршуваат своите надлежности и да испорачуваат поквалитетни услуги за граѓаните“, изјави Перински.
Во рамки на средбата било разговарано и за тековните и планираните инвестиции во општината. Преку двата јавни повика за финансирање инфраструктурни проекти, за Општина Петровец се одобрени вкупно седум проекти во вредност од 100.727.775 денари.
Градоначалникот Борче Митевски ја поздравил континуираната поддршка од Министерството за локална самоуправа, истакнувајќи дека постојаната комуникација меѓу централната и локалната власт е од особено значење за развојот на општините.
„За општините е важно да имаат институционален партнер кој ги разбира нивните потреби и нуди конкретна поддршка. Проектите што ги реализираме со поддршка на Владата и Министерството придонесуваат за подобрување на инфраструктурата и условите за живот на граѓаните, а Ресурсниот центар отвора дополнителни можности за унапредување на општинските капацитети“, истакна Митевски.
Од Министерството за локална самоуправа информираат дека теренските посети на општините ќе продолжат и во наредниот период, со цел непосредно согледување на локалните потреби и обезбедување навремена поддршка за нивниот развој.
