Министерството за локална самоуправа информира дека министерот Златко Перински во рамки на караванот „Каде што срцето е дома“ остварил работна посета на Општина Вевчани.
Се наведува дека при посетата Перински одржал средба со градоначалникот Спасе Кочовски, како и со членовите на Советот и општинската администрација, на која се разговарало за реализацијата на проектите одобрени во 2025 година и за тековните потреби за поддршка од централната власт.
Од Министерството наведуваат дека посебен акцент бил ставен на унапредување на законската рамка за меѓуопштинска соработка, при што се нагласува дека здружувањето на општините, особено на помалите, е решение за ограничените административни и финансиски капацитети.
Се истакнува дека целта е создавање функционална законска рамка која ќе ја олесни и поттикне меѓуопштинската соработка, како и обезбедување институционална и експертска поддршка преку Ресурсниот центар.
Од Општина Вевчани се наведува дека во рамки на јавните повици за капитална инфраструктура се одобрени девет проекти во вредност од 25.869.953 денари, додека во текот на 2025 година се реализирани три проекти насочени кон енергетска ефикасност, јакнење на општинските капацитети и подобрување на комуналните услуги.
Министерството за локална самоуправа најавува продолжување на активностите со фокус на зајакнување на локалните капацитети, намалување на регионалните разлики и подобрување на животниот стандард на граѓаните.
