Ситуацијата на глобалните пазари на нафта брзо се влошува поради нестабилноста во Персискиот Залив, а големи количества нафта се повлекуваат од меѓународната понуда, изјави во понеделникот портпаролот на Кремљ, Дмитриј Песков. Тој на брифингот за новинарите во Москва истакна дека од пазарот исчезнува огромно количество нафта, пишува „Анадолу“.
„Само поради прекинот на работата на нафтоводот во Саудиска Арабија, од глобалниот пазар исчезнаа повеќе од четири отсто од светските залихи. Тоа неизбежно има многу сериозни последици и предизвикува загриженост во светските економии“, рече Песков.
Тој наведе дека Русија вовела забрана за извоз на нафтени деривати за да обезбеди доволни залихи за домашниот пазар.
„Кога нашиот домашен пазар ќе биде сигурно снабден, ќе се разгледува укинувањето на забраната. Тогаш дополнителните количества нафтени деривати повторно ќе бидат насочени кон светските пазари“, посочи тој.
Песков додаде дека и повлекувањето на руските нафтени деривати од меѓународниот извоз влијае врз глобалните пазари.
Неговите изјави доаѓаат во момент кога саудискиот нафтовод „Исток-Запад“ и натаму е затворен по нападот, што се заканува дополнително да ги намали глобалните залихи и да ги зголеми цените на енергенсите.
Нафтоводот пренесувал меѓу четири и пет милиони барели дневно, што одговара на околу четири до пет отсто од глобалното снабдување.
Песков ги поздрави повиците Киев да ги прекине нападите врз руската цивилна економска инфраструктура. Притоа го спомена апелот на американскиот претседател Доналд Трамп до украинскиот претседател Володимир Зеленски да ги прекине нападите врз руското производство на дизел поради загриженоста за влијанието врз економијата на САД.
„Секој повик до киевскиот режим да ги прекине нападите врз цивилната економска инфраструктура може само да се поздрави“, рече тој.
На прашањето за извештаите на западните медиуми дека Украина губи во конфликтот, Песков одговори дека верува оти текот на настаните на бојното поле станува сè појасен за западните аналитичари.
Според него, претходно постоело „големо погрешно уверување“ дека Украина може да му се спротивстави на рускиот притисок.
„Експертите и сериозните аналитичари, врз основа на динамиката на бојното поле, сè повеќе согледуваат дека Русија од ден на ден ги подобрува своите позиции и доследно напредува кон остварување на своите цели“, изјави тој.
Песков изјави дека рускиот претседател Владимир Путин позитивно ја оценил подготвеноста на Кина и Индија да придонесат во напорите за решавање на конфликтот во Украина.
„Секоја земја може да го искористи своето влијание врз киевскиот режим за да го поттикне на поголема флексибилност, што би претставувало значаен придонес кон решавањето на конфликтот“, рече Песков.
Тој не сакаше да ја коментира одлуката на Финска да се приклучи кон проектот за напредно нуклеарно одвраќање поддржан од Франција.
„Искрено, не разбирам за каков точно концепт станува збор. Морам да се запознаам со деталите и затоа се воздржувам од коментар“, изјави тој.
На крајот, Песков наведе дека на неодамнешниот самит на групата БРИКС во Њу Делхи не се разговарало за проширување на сојузот ниту за конкретни кандидати за членство.
Тој додаде дека Русија ја поддржува желбата на Куба да се приклучи кон групата и ја поздравува намерата на Хавана да дејствува во рамките на организацијата.
