Пет лица приведени за семејно насилство во едно деноноќие

Во текот на изминатото деноноќие, полициски службеници низ државата лишиле од слобода пет лица по пријави за семејно насилство, физички напади, закани и вознемирување, информираа од Министерството за внатрешни работи.

— реклама —

Во Струмица, на 24 јуни во 08:20 часот, полициски службеници од СВР Струмица го лишиле од слобода П.П.(48) од Струмица, постапувајќи по пријава од неговата 43-годишна поранешна партнерка. Според пријавеното, тој претходната вечер во дворот на нејзината семејна куќа физички ја нападнал по кратка расправија, а подолг период психички и физички ја малтретирал и ѝ упатувал закани.

Во кичевскиот регион, полициски службеници од полициското одделение во Зајас на 23 јуни во 16:30 часот го привеле Ф.Р.(45) од кичевско село, откако било пријавено дека во семејниот дом со дрвен предмет ја нападнал својата сестра.

— реклама —

Во Велес, на 24 јуни во 03:40 часот, бил приведен К.Ш.(18) од Велес, по пријава дека во својот дом ја држел неговата 18-годишна партнерка од виничко село, ѝ се заканувал и не ѝ дозволувал да го напушти домот. За случајот биле известени јавен обвинител и Центарот за социјални работи во Велес.

— реклама —

На 23 јуни во 18:30 часот во Тетово, полициски службеници го лишиле од слобода П.А.(36) од Тетово, по пријава од неговиот 60-годишен татко дека во дворот на семејната куќа агресивно се однесувал, искршил дел од покуќнината и упатувал закани кон него и неговата сопруга.

Во Крива Паланка, пак, на 23 јуни во 19:40 часот бил приведен М.С.(19), откако неговата 18-годишна поранешна девојка пријавила дека во повеќе наврати ја следел, вознемирувал и ѝ упатувал закани.

— реклама —

Од МВР информираат дека се преземаат мерки за целосно расчистување на сите случаи, по што против осомничените ќе бидат поднесени соодветни пријави.