Министерството за внатрешни работи во текот на изминатото деноноќие евидентирало пет случаи на семејно насилство, при што четири лица биле лишени од слобода поради сомнение за сторено насилство врз членови на семејството.
На 21 јуни околу 01:20 часот, полициски службеници од СВР Штип го лишиле од слобода С.Е. (37) од Штип, постапувајќи по пријава дека физички ја нападнал својата сопруга.
Само петнаесет минути подоцна, во 01:35 часот, полициски службеници од ОВР Гостивар го привеле М.С. (51) од Гостивар, по претходна пријава дека физички ја нападнал сопругата.
Во Скопје, на 20 јуни во 01:40 часот, полициски службеници го лишиле од слобода С.М. (33), откако неговата 31-годишна сопруга пријавила дека агресивно се однесувал и се обидел да ја нападне со остар предмет.
Истиот ден, во 17:30 часот, полициски службеници од СВР Скопје лишиле од слобода 33-годишна жена од скопско, по пријава од нејзиниот 36-годишен сопруг, со кого е во бракоразводна постапка, дека агресивно се однесувала кон него и му упатувала закани во семејниот дом. Подоцна, во 23:30 часот, жената пријавила дека по кратка расправија била физички нападната од сопругот, кој употребил и тврд предмет.
Дополнително, на 21 јуни во 03:00 часот, 30-годишна жена од Скопје пријавила дека претходната вечер, околу 20:00 часот, таа и нејзиниот поранешен сопруг биле физички нападнати од нејзиниот 36-годишен партнер.
Од МВР информираат дека се преземаат мерки за целосно расчистување на сите случаи, по што против сторителите ќе бидат поднесени соодветни пријави.
