Петмина загинати во руски напад со дрон врз патнички автобус во Украина

Пет лица загинаа, а најмалку седум се повредени во руски напад со дрон врз патнички автобус во југоисточниот дел на Украина, соопшти регионалниот гувернер.

Нападот се случил во областа на Никопол, во Дњепропетровската област. Гувернерот Олександар Хања на „Телеграм“ објавил фотографија од погоденото бело возило, со искршени прозорци и траги од крв на неговата странична страна.

— реклама —

Никопол се наоѓа покрај реката Дњепар, спроти територија под руска окупација и често е мета на руски напади.

„Русите целеа во минибус кој превезуваше луѓе на пат кон нивните секојдневни обврски“, изјавил Микола Лукашук, претседател на Советот на Дњепропетровската област.

— реклама —

Русија веднаш не го коментирала нападот. И Украина и Русија негираат дека намерно гаѓаат цивили во војната што започна со руската целосна инвазија врз Украина во 2022 година.

— реклама —

Ова не е прв смртоносен напад со дрон врз возило со патници во Никопол годинава. Во април руски дрон погодил градски автобус во центарот на градот, при што загинале три лица, а 12 биле повредени.

На почетокот на април, во руски напад со дрон врз градскиот пазар во Никопол загинале пет лица, а 19 биле повредени.

Кон крајот на јуни, руски дрон погодил и минибус во Никопол. Тогаш загинале двајца патници, а 12 лица биле повредени, меѓу кои и две деца.