СДСМ преку соопштение ги повика пратеникот Бране Петрушевски и портпаролот на ВМРО-ДПМНЕ, Наум Стоилковски Манасиевски, лично да ги посетат граѓаните во Гостивар и да им кажат дека водата е безбедна за пиење, наместо, како што велат од партијата, да ги обвинуваат за ширење паника.
Од СДСМ реагираат на нивните изјави дека партијата и нејзиниот лидер Венко Филипче пласираат невистини за состојбата со водоснабдувањето во Гостивар, оценувајќи дека станува збор за политичка пропаганда и обид за избегнување одговорност.
Во соопштението се упатуваат критики и кон новинарот Драган Павловиќ Латас, за кого СДСМ тврди дека има влијание врз јавните настапи на претставниците на ВМРО-ДПМНЕ.
Партијата порача дека доколку власта е уверена оти водата е исправна, нејзините претставници треба тоа да им го соопштат директно на жителите на Гостивар. Воедно, ги повика да ги посетат и локациите покрај реките Лепенец и Вардар и да ги уверат граѓаните дека нема загадување.
Од СДСМ оценуваат дека обвинувањата за „лажни вести“ и „дезинформации“ се обид да се избегне одговорноста за актуелната состојба, додавајќи дека граѓаните ја изгубиле довербата во институциите и во информациите што доаѓаат од власта.
