Седумдесет и деветгодишен жител на охридското село Коњско е лишен од слобода откако под дејство на алкохол предизвикал сообраќајна незгода во која биле оштетени шест паркирани возила.
Како што информираат од Министерството за внатрешни работи, настанот се случил на 25 јуни околу 12:20 часот на булеварот „Туристичка“ во Охрид.
К.Р. (79), управувајќи патничко возило „мерцедес“ со охридски регистарски ознаки, удрил во шест паркирани автомобили, по што не застанал на местото на несреќата, туку продолжил да се движи со возилото.
По преземени мерки од страна на полициските службеници, возачот бил пронајден на улицата „Питу Гули“ во Охрид и лишен од слобода.
При извршеното алкотестирање било утврдено дека тој управувал со возилото со 1,51 промили алкохол во крвта, по што бил задржан во полициска станица.
По целосното документирање на случајот, против него ќе биде поднесена соодветна пријава, соопшти МВР.
