Во текот на јуни, Заводот за итна медицинска помош на Сплитско-далматинската жупанија регистрирал повеќе од 50 повици поврзани со лица во алкохолизирана состојба, а најголемиот дел од интервенциите се однесувале на млади странски туристи.
Според податоците, екипите на Итната помош затекнале 44 лица на местото на пријавата, додека осум лица не биле пронајдени по пристигнувањето. Меѓу лицата на кои им била укажана помош имало и двајца малолетници.
Неофицијално, најголемиот број интервенции на јавни места се поврзани со млади туристи кои летуваат во Сплит. Граѓаните често ги затекнуваат како лежат на улици или тротоари во раните утрински часови и поради тоа повикуваат Итна помош.
Најмногу повици се евидентираат за време на викендите, кога туристите масовно учествуваат во организирани тури низ барови, познати како „паб кроул“, при што посетуваат повеќе локали и консумираат поголеми количества алкохол.
Од Сплитско-далматинската полициска управа информираат дека не водат посебна евиденција за ваквите случаи, но посочуваат дека годинава состојбата не се разликува значително од претходните сезони.
Според статистичката анализа за туристичкиот промет во Сплит за 2024 година, најголем број ноќевања оствариле туристите на возраст од 18 до 24 години, што, според полицијата, потврдува дека младите и натаму се најбројната група посетители во градот.
