Голем пожар и материјална штета од десетици милиони евра биле спречени во Словачка, откако полицијата открила и спречила план за подметнување пожар во производствен погон на украинскиот производител на беспилотни летала „Skyeton“.
Словачките власти ги објавија деталите за акцијата, спроведена под кодното име „Дрон“, вчера. Во рамките на истрагата биле идентификувани лица кои, според полицијата, го подготвувале нападот врз фабриката во источниот дел на земјата.
Истрагата ја започнала Единицата за борба против криминалот (ÚBOK), откако добила информации од словачката разузнавачка служба и военото разузнавање. Полицијата потоа ги идентификувала осомничените и презела акција пред да биде реализиран нападот.
При претресите биле запленети запаливи материи, алат, мобилни телефони, акциска камера и рачно нацртан план. Прелиминарните вештачења покажале дека запленетата смеса содржела бензин и полистирен – компоненти познати по употребата за изработка на напалм.
Во Словачка биле уапсени двајца осомничени, додека третото лице било уапсено во Германија врз основа на европски налог за апсење. Сите тројца се странски државјани и се товарат за подготовка на тешко кривично дело против општата безбедност.
Полицијата предупреди дека последиците можеле да бидат сериозни. Во моментот на планираниот напад во објектот можеле да се наоѓаат околу 70 вработени, додека вредноста на имотот во производствениот погон се проценува на десетици милиони евра.
Од „Skyeton“ изјавија дека Русија систематски се обидува да ги напаѓа компаниите што работат за Украина, како и да го наруши нивниот углед. Од компанијата им се заблагодарија на словачките безбедносни служби за спречувањето на нападот и апсењето на осомничените.
Случајот се истражува, а словачките власти најавија дека истрагата продолжува.
Сличен инцидент се случи и на 20 март во чешкиот град Пардубице, каде што беше запален производствен погон на украинската компанија „Archer“, која произведува термовизиска опрема.
